ରାଜ୍ୟ ସରକାର କରୋନାକୁ ମହାମାରି ଘୋଷଣା କରିଲେ । କରୋନା ଯାହା ସାରା ବିଶ୍ୱରେ ମୃତ୍ୟୁର ବିଭିଷିକା ରଚିଛି ଓଡିଶାରେ ତାହାର ମୁକାବିଲା କରିବା ପାଇଁ ସରକାରବି ଅଂଟା ଭିଡିଛନ୍ତି । ବ୍ୟାପକ ପ୍ରସ୍ତୁତି ସରକାର କରୁଛନ୍ତି । ପୁରା ରାଜ୍ୟ ଲକଡାଉନରେ ଅଛି । ରାଜ୍ୟରେ ୧୦ଟିରୁ ଅଧିକ ସ୍ଥାନରେ କୋଭିଡ ହସ୍ପିଟାଲ ହେବା ସହିତ ପ୍ରତି ପଂଚାୟତରେ ଆଇସୋଲସେନ କେନ୍ଦ୍ର ବି ସରକାର ପ୍ରସ୍ତୁତି କରିଛନ୍ତି । ହେଲେ ସରକାର ଏତେ ସବୁ ପଦକ୍ଷେପ ବେଳେ ଗୋଟିଏ ଆଶ୍ଚର୍ଯ୍ୟ ଘଟଣା ଦେଖିବାକୁ ମିଳୁଛି । ଏତେ ସବୁ ପ୍ରସ୍ତୁତି ଓ ବ୍ୟବସ୍ଥା ହେଲାବେଳେ ରାଜ୍ୟର ମନ୍ତ୍ରୀମାନଙ୍କର ଦେଖାନାହିଁ । କରୋନାକୁ ରାଜ୍ୟ ବିପର୍ଯ୍ୟୟ ଘୋଷଣା କରାଯାଇଛି ହେଲେ ଏବେ ସୁଦ୍ଧା ବିପର୍ଯ୍ୟୟ ପ୍ରଶମନ ମନ୍ତ୍ରୀ ସୁଦାମ ମାରାଣ୍ଡିଙ୍କର ଦେଖା ନାହିଁ । ସ୍ୱାସ୍ଥ୍ୟ ବିଭାଗର ଏବେ ସବୁଠାରୁ ଅଧିକ ଦାୟୀତ୍ୱ । ହେଲେ ରାଜ୍ୟର ସ୍ୱାସ୍ଥ୍ୟ ମନ୍ତ୍ରୀ ନବ ଦାସ ଲାପତା ଅଛନ୍ତି । ଥରେ ଆସିଥିଲେ ଗଣମାଧ୍ୟମ ସାମନାକୁ । ହେଲେ ସେ ଯାହା କହିଲେ ତାକୁ ସରକାରଙ୍କର ଅଧିକାରି ତାପରଦିନ ଖଣ୍ଡନ କରିଲେ ଓ ଅଧିକାରିଙ୍କ କଥା ରହିଲା । ସାରା ରାଜ୍ୟରେ ଲକଡାଉନ । ପୋଲିସ ପୁରା ଲକଡାଉନର ଦାୟୀତ୍ୱରେ । ହେଲେ ଗୃହ ବିଭାଗର ମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ରଙ୍କର ଏବେ ସୁଦ୍ଧା ଦେଖାନାହିଁ । ପ୍ରତି ପଂଚାୟତରେ ଆଇସୋଲେସନ କେନ୍ଦ୍ର ପ୍ରସ୍ତୁତ ହେଲା । ହେଲେ ପଂଚାୟତ ରାଜ ମନ୍ତ୍ରୀ ପ୍ରତାପ ଜେନାଙ୍କର ଉପସ୍ଥିତି କେଉଁଠି ନଜର ଆସିଲା ନାହିଁ । ରାଜ୍ୟରେ ଦିଆଯାଇଥିବା ବାର୍ଦ୍ଧ୍ୟକ ଭତା, ଦିବ୍ୟାଙ୍ଗ ଭତା ସବୁ ଆଗୁଆ ଦିଆଗଲା । ହେଲେ ବିଭାଗୀୟ ମନ୍ତ୍ରୀ ଅଶୋକା ପଣ୍ଡା ରାଜଧାନୀ ଭୁବନେଶ୍ୱରରେ ଥିଲେ ବି ତାଙ୍କୁ କେଉଁଠି ଦେଖିବାକୁ ମିଳିଲା ନାହିଁ । ରାଜ୍ୟରେ ହିତାଧିକାରିଙ୍କୁ ଆଗୁଆ ରେସନ ମିଳିଲା । ଖାଲି ସେତିକି ନୁହେଁ ଲକଡାଉନ ବେଳେ ରାଜ୍ୟରେ ଅତ୍ୟାବଶ୍ୟକ ଖାଇବା ସାମଗ୍ରୀ ମହଜୁଦ ଅଛି କି ନାହିଁ ସେସବୁ ଖାଉଟି କଲ୍ୟାଣ ବିଭାଗର କାମ । ହେଲେ ବିଭାଗୀୟ ମନ୍ତ୍ରୀ କୁଆଡେ ଯାଇଛନ୍ତି କେଜାଣି ସବୁ ତାଙ୍କ ବିଭାଗୀୟ ଅଧିକାରି ମାନେ କରିଲେ । ଏପୁରା ପ୍ରକିୟାରେ ମନ୍ତ୍ରୀମାନଙ୍କୁ ପଚାରି ବିଭାଗୀୟ ଅଧିକାରୀମାନେ ନିଷ୍ପତି ନେଉଥିଲେ ନା ବିଭାଗୀୟ ବାବୁମାନେ ନିଜେ ସମସ୍ତ ନିଷ୍ପତି ନେଉଥିଲେ ତାହା ଏବେ ଚର୍ଚ୍ଚାର ବିଷୟ । ଅବଶ୍ୟ ଉଚ୍ଚଶିକ୍ଷା ଓ ଗଣଶିକ୍ଷା ମନ୍ତ୍ରୀଙ୍କର କିଛି ଭିଡିଓ ସୋସିଆଲ ମେଡିଆରେ ଦେଖିବାକୁ ମିଳୁଥିଲା ଯେଉଁଥିରେ ଅନଲାଇନରେ କେମିତି ଗଣିତ କରିବ, କେମିତି ପରୀକ୍ଷା ପାଇଁ ଛାତ୍ର ଛାତ୍ରୀମାନେ ପାଠ ପଢିବେ ତାହା ସେମାନେ ବୁଝାଉଥିଲେ ।
ଗୋଟିଏ କଥା ପ୍ରମାଣିତ ହେଲା ଯେ ଓଡିଶାରେ ବିନା ମନ୍ତ୍ରୀରେ ସରକାର ଚାଲିପାରୁଛି । କରୋନା ମୁକାବିଲା ସବୁ କିଛି ଅଫିସର ମାନେ କରିଲେ । ଖାଲି ସେତିକି ନୁହେଁ ଜରୁରୀକାଳିନ ପରିସ୍ଥିତିରେ ରାଜ୍ୟର ଅସଲ ଶାସନ ଭାର ଅଫିସରମାନଙ୍କ କାନ୍ଧରେ ରହିଛି ଏକଥା ପ୍ରମାଣିତ ହେଲା । ଦେଶର ସମ୍ବିଧାନ ନିର୍ବାଚିତ ସରକାରଙ୍କୁ ଲୋକମାନଙ୍କ ପାଖରେ ଉତରଦାୟୀ କରିଛି । ସରକାର କହିଲେ ମୁଖ୍ୟମନ୍ତ୍ରୀ ଓ ମନ୍ତ୍ରୀମଣ୍ଡଳକୁ ବୁଝାଏ । ସେମାନେ ହେଲେ ବ୍ୟବସ୍ଥାପିକା । ବ୍ୟବସ୍ଥାପିକା ପାଖେ କାର୍ଯ୍ୟପାଳିକା ଉତରଦାୟୀ । ମନ୍ତ୍ରୀମଣ୍ଡଳ ପାଖେ ବ୍ୟୁରୋକ୍ରାଟମାନେ ଉତରଦାୟୀ । ସରକାରଙ୍କ ସବୁ ନିଷ୍ପତି ମନ୍ତ୍ରୀମଣ୍ଡଳ ନେବାକଥା ଓ ତାକୁ ସଠିକ ଭାବେ କାର୍ଯ୍ୟକାରି କରିବା କାମ ହେଉଛି ଅଫିସରମାନଙ୍କର । ହେଲେ ଓଡିଶାରେ ହେଉଛି ଓଲଟା । ଘୋଷଣା ବିଭାଗୀୟ ଅଧିକାରିମାନେ କରୁଛନ୍ତି ଓ ପରେ ତାକୁ କ୍ୟାବିନେଟରେ ପାସ କରାଗଲା । ଏବେ କରୋନା ପରିପ୍ରେକ୍ଷିରେ ହୋଇଥିବା କ୍ୟାବିନେଟର ସବୁ ନିଷ୍ପତି ଆଗରୁ ପ୍ରାୟତ ଗଣମାଧ୍ୟମରେ ସୂଚନା ଦିଆଯାଇସାରିଥିଲା । କ୍ୟାବିନେଟ କେବଳ ଏକ ଔପଚାରିକ ଥିଲା ।
ରାଜ୍ୟ ସରକାରଙ୍କର କରୋନା ମୁକାବିଲାର କାର୍ଯ୍ୟପଦ୍ଧତି ଦେଖିଲେ ଲାଗୁଛି କିଛି ପ୍ରଶାସନିକ ଅଧିକାରିମାନେ ହିଁ ସରକାର ଚଲାଉଛନ୍ତି । ଏକଥା ଆଉଥରେ ପୁନଃ ପ୍ରମାଣିତ ହେଉଛି । ଅର୍ଥମନ୍ତ୍ରୀ, ସ୍ୱାସ୍ଥ୍ୟ ମନ୍ତ୍ରୀ, ରାଜସ୍ୱ ଓ ବିପର୍ଯ୍ୟୟ ପ୍ରଶମନ ମନ୍ତ୍ରୀ, ପଂଚାୟତରାଜ ମନ୍ତ୍ରୀ, ଖାଉଟି କଲ୍ୟାଣ ମନ୍ତ୍ରୀ, ଏସବୁ ମନ୍ତ୍ରୀ ମାନେ କୁଆଡେ ଗଲେ ? ନା କାହାର ଏହି କରୋନା ମୁକାବିଲାରେ ଅଂଶଗ୍ରହଣ ଅଛି ନା କାହାର ଉପସ୍ଥିତି ଦେଖାଯାଉଛି । ଏପରିକି ଗଣମାଧ୍ୟମରେ ବିବୃତି ବି ନାହିଁ । କରୋନା ଭଳି ସଙ୍ଗିନ ସ୍ଥିତିରେ ତ ସରକାର ବିରୋଧୀ ଦଳକୁ ବି ସାଙ୍ଗରେ ନେବା କଥା । ହେଲେ ଏଠିତ ମନ୍ତ୍ରୀ ମାନଙ୍କୁ ବି ପଚରାଯାଉନି । ବିଧାୟକ, ବିରୋଧୀଦଳକୁ ପଚାରେ କିଏ ? ଓଡିଶା ରାଜନିତି ଇତିହାସରେ ଏପରି ଆଗରୁ କେବେ ଦେଖାଯାଇନଥିଲା ।