ଉତର ପ୍ରଦେଶର ଇଲାହାବାଦ ହାଇକୋର୍ଟ ଗୋ ହତ୍ୟା ସମ୍ପର୍କିତ ଏକ ମାମଲାର ଶୁଣାଣୀ କରି ଗୁରୁତ୍ୱପୂର୍ଣ ମନ୍ତବ୍ୟ ଦେଇଛନ୍ତି । ଏହା ଦ୍ୱାରା ଗୋରକ୍ଷା ପ୍ରଶ୍ନ ନେଇ ପୁଣି ଥରେ ଆଲୋଚନା ଆରମ୍ଭ ହୋଇଛି । ଆସନ୍ତୁ ଏବେ ଦୃଷ୍ଟି ପକାଇବା ଇଲାହାବାଦ ହାଇକୋର୍ଟ ( Allahabad High Court ) ଏହି ମାମଲାରେ କଣ ଗୁରୁତ୍ୱପୂର୍ଣ କଥା କହିଛନ୍ତି । ଏ ସମ୍ପର୍କରେ କିଛି ଗୁରୁତ୍ୱପୂର୍ଣ ବିନ୍ଦୁ ହେଲା ଯେ ଗାଈ ହେଉଛି ଭାରତର ସଂସ୍କୃତିର ଅଂଶବିଶେଷ । କୌଣସି ରାଷ୍ଟ୍ରର ସଂସ୍କୃତି ଓ ଆସ୍ଥା ଉପରେ ଯଦି ଆକ୍ରମଣ କରାଯାଏ ତେବେ ସେହି ରାଷ୍ଟ୍ର ଦୁର୍ବଳ ହୋଇଯାଇଥାଏ । ଗୋରକ୍ଷା ହିନ୍ଦୁ ମାନଙ୍କର ମୌଳିକ ଅଧିକାର ( Fundamental Rights of Hindus ) ହେବା ଉଚିତ । ତେଣୁ ଗାଈକୁ ରାଷ୍ଟ୍ରୀୟ ପଶୁ ଘୋଷଣା ( Cow As National Animal ) କରାଯିବା ଆବଶ୍ୟକ ।
ବାସ୍ତବରେ ଦେଖିବାକୁ ଗଲେ ଗାଈ ଭାରତୀୟ ସଭ୍ୟତା ଓ ସଂସ୍କୃତିର ଆଧାର । ଗାଈ ଭାରତୀୟ ରାଷ୍ଟ୍ର ଓ ଭାରତୀୟ ଅର୍ଥନୀତିର ମେରୁଦଣ୍ଡ । ଗାଈକୁ ଭାରତରେ ଗୋମାତା କୁହା ଯାଏ, କାମଧେନୁ କୁହା ଯାଏ । କୁହା ଯାଏ ଯେ ଗୋ ମାତା ଠାରେ ୩୩ କୋଟି ଦେବୀ ଦେବତା ନିବାସ କରନ୍ତି । ତେଣୁ ଗୋ ମାତା ଏଠାରେ ପୂଜ୍ୟ ।
କିନ୍ତୁ ଦୁର୍ଭାଗ୍ୟର ବିଷୟ ଯେ ଭାରତ ଭଳି ଦେଶରେ ନିରନ୍ତର ଗୋ ଚାଲାଣ ଓ ଗୋ ହତ୍ୟା ( Cow Trafficking & Cow Slaughtering ) ଚାଲିଛି । ଏହାକୁ ରୋକିବା ପାଇଁ କାହାର ଇଚ୍ଛା ଶକ୍ତି ଥିଲା ଭଳି ଲାଗୁ ନାହିଁ । ପ୍ରତିଦିନ ଟ୍ରକ ଯୋଗେ ଗୋ ଚାଳାଣ ହେଉଥିବାର ଖବର ଆସୁଛି । ଇଲାହାବାଦ ହାଇକୋର୍ଟ ଏହି ମାମଲାରେ ଆହୁରି କିଛି ଗୁରୁତ୍ୱପୂର୍ଣ ମନ୍ତବ୍ୟ ଦେଇଛନ୍ତି । ହାଇକୋର୍ଟ କହିଛନ୍ତି ଯେ ଗୋମାଂସ ଖାଇବା ଲୋକଙ୍କୁ ହିଁ ମୌଳିକ ଅଧିକାର ମିଳି ନାହିଁ ବରଂ ଗାଈକୁ ପୂଜା କରୁଥିବା ଓ ଯାହାଙ୍କର ଜୀବିକା ଗାଈ ଉପରେ ଆଧାରିତ ସେମାନଙ୍କୁ ମଧ୍ୟ ଏକ ସାର୍ଥକ ଓ ଅର୍ଥପୂର୍ଣ ଜୀବନ ଜୀଇଁବାର ପୂରା ଅଧିକାର ରହିଛି । ଜୀବନର ଅଧିକାର ସବୁଠାରୁ ଉର୍ଧରେ ଓ କାହାକୁ ହତ୍ୟା କରିବାର ଅଧିକାର ଓ ଗୋ ମାଂସ ଖାଇବାର ଅଧିକାରକୁ ଏହା ଉପରେ ରଖା ଯାଇ ପାରିବ ନାହିଁ । ଗାଇ ଯେତେବେଳେ ବୃଦ୍ଧ ହୋଇଯାଇଥାଏ ଓ ବେମାର ପଡିଥାଏ ସେତେବେଳେ ମଧ୍ୟ ଗାଈ ଉପଯୋଗୀ ହୋଇଥାଏ । ଗାଈର ଗୋବରରେ ସାର ତିଆରି କରିବା ଓ ଗୋମୁତ୍ରକୁ ଔଷଧ ନିର୍ମାଣରେ ପ୍ରୟୋଗ କରାଯାଇଥାଏ । ଗାଈ ବୁଢୀ ହେଉ ବା ବେମାର ପଡୁ ତାକୁ ମା ରୂପେ ପୂଜା କରାଯାଇଥାଏ ।
ଇଲାହାବାଦ ହାଇକୋର୍ଟ ( Justice Shekhar Kumar Yadav ) ଆହୁରି କହିଛନ୍ତି ଯେ କେବଳ ହିନ୍ଦୁ ହିଁ ନୁହନ୍ତି ଅନେକ ମୁସଲାମନ ଶାସକ ମାନେ ମଧ୍ୟ ଗାଈକୁ ଜୀବନର ଗୁରୁତ୍ୱପୂର୍ଣ ଅଂଶ ବୋଲି ମନେ କରୁଥିଲେ । ଅନେକ ମୁସଲମାନ ଶାସକ ମାନେ ଇସଲାମୀ ପର୍ବ ମାନଙ୍କରେ ଗୋହତ୍ୟା ଉପରେ ରୋକ ଲଗାଇଥିଲେ । ଗୋମାତାର ଗୁରୁତ୍ୱ ଓ ଆସ୍ଥାକୁ ଆଖି ଆଗରେ ରଖି ଦେଖି ସୁପ୍ରିମକୋର୍ଟ ମଧ୍ୟ ଅନେକ ଗୁରୁତ୍ୱପୂର୍ଣ ରାୟ ଦେଇ ସାରିଛନ୍ତି ।
ଗୋ ରକ୍ଷାର କାମ କେବଳ ଗୋଟିଏ ଧର୍ମର ନୁହେଁ, ଗାଈକୁ କେବଳ ଧାର୍ମିକ ଆଧାରରେ ଦେଖା ଯିବା ଉଚିତ ନୁହେଁ । ଗାଈ ଭାରତର ସଂସ୍କୃତି ଓ ସଂସ୍କୃତିର ରକ୍ଷା କରିବାର ଦାୟିତ୍ୱ ଦେଶର ପ୍ରତ୍ୟେକ ନାଗରିକର । ଏପରି ଶହ ଶହ ଉଦାହରଣ ଆମ ନିକଟରେ ରହିଛି ଯେ ଯେତେବେଳେ ଆମେ ଆମର ସଂସ୍କୃତିକୁ ଭୁଲି ଯାଇଛେ, ବିଦେଶୀ ମାନେ ଆମ ଉପରେ ଆକ୍ରମଣ କରିଛନ୍ତି ଓ ଆମେ ପରାଜିତ ହୋଇଛେ । ଯଦି ଏବେ ମଧ୍ୟ ଆମେ ଜାଗ୍ରତ ନ ହେବା ତେବେ ଆମେ ଭୁଲିବା ଉଚିତ ନୁହେଁ ଯେ ତାଲିବାନ କିପରି ଏବେ ଆଫଗାନିସ୍ତାନ ଉପରେ ଅଧିକାର କରି ନେଇଛି ।
ଏହି ମାମଲାରେ ଇଲାହାବାଦ ହାଇକୋର୍ଟ ଦ୍ରଷ୍ଟା ତଥା ଆର୍ୟ୍ୟ ସମାଜର ପ୍ରତିଷ୍ଠାତା ସ୍ୱାମୀ ଦୟାନନ୍ଦ ସରସ୍ୱତୀଙ୍କ ( Swami Dayananda Saraswati ) କଥାକୁ ମଧ୍ୟ ଉଦ୍ଧୃତ କରିଛନ୍ତି । କୋର୍ଟ କହିଛନ୍ତି - ଗୋଟିଏ ଗାଈ ନିଜର ଜୀବନ କାଳରେ ୪ ଲକ୍ଷ ୧୦ ହଜାର ୪୪୦ ଜଣଙ୍କର ଗୋଟିଏ ଥରର ଭୋଜନ ଯୋଗାଇଥାଏ ହେଲେ ତାର ମାଂସରେ କେବଳ ୮୦ ଜଣଙ୍କର ଭୋଜନ ହୋଇ ଥାଏ । କୋର୍ଟ ଆହୁରି କହିଛନ୍ତି ଯେ ଗାଈର ମହିମା ବେଦ ଓ ପୁରାଣରେ ଉଲ୍ଲେଖ ରହିଛି । ଜଣେ ମୁସଲମାନ କବି ରସ ଖାନ କହିଥିଲେ ଯେ ଯଦି ମୋତେ ଭଗବାନ ଜନ୍ମ ଦେବେ ତେବେ ନନ୍ଦର ଗାଈ ମାନଙ୍କ ମଧ୍ୟରେ ଜନ୍ମ ଦିଅନ୍ତୁ ।
ଇଲାହାବାଦ କୋର୍ଟ ଆହୁରି କହିଛନ୍ତି ଯେ ଗାଈର ଚର୍ବିକୁ ନେଇ ମଙ୍ଗଲ ପାଣ୍ଡେ ବିପ୍ଲବ ( Sepoy Mutiny ) କରିଥିଲେ । ସମ୍ବିଧାନରେ ମଧ୍ୟ ଗୋ ସଂରକ୍ଷଣ ଉପରେ ଗୁରୁତ୍ୱ ପ୍ରଦାନ କରାଯାଇଛି । ମହାରାଜା ରଣଜୀତ ସିଂହଙ୍କ ଶାସନକାଳରେ ଗୋହତ୍ୟା କରୁଥିବା ଲୋକଙ୍କୁ ମୃତ୍ୟୁ ଦଣ୍ଡ ଦିଆଯିବାର ବ୍ୟବସ୍ଥା ଥିଲା । ଇଲାହାବାଦ ହାଇକୋର୍ଟ କିଛି ନୂଆ କହି ନାହାନ୍ତି । ହାଇକୋର୍ଟ ଯାହା କହିଛନ୍ତି ତାହା ଗାନ୍ଧୀଜୀଙ୍କ ପରି ଭାରତର ମନିଷୀ ମାନେ ବାରମ୍ବାର କହି ଆସିଛନ୍ତି । ଗାଈକୁ ସରଳ ନିର୍ଦୋଷତାର ପ୍ରତୀକ ବୋଲି ମହାତ୍ମା ଗାନ୍ଧୀ ( Mahatma Gandhi ) କହିଥିଲେ । ସେ କହୁଥିଲେ୍ ଘାସ ଖାଇ ଅମୃତସମ ଦୁଗ୍ଧ ପ୍ରଦାନ କରୁଥିବା ଗାଇ ବାସ୍ତବରେ ପ୍ରଭୁଙ୍କ ସର୍ବୋତ୍କୃଷ୍ଟ ସୃଷ୍ଟି । ଗାନ୍ଧୀଜୀ କହନ୍ତି - ଗାଈ କରୁଣାର କାବ୍ୟ ଅଟେ । ଏହି ସୌମ୍ୟ ପଶୁ କରୁଣାର ମୂର୍ତମନ୍ତ ପ୍ରତୀକ ଅଟେ । ସେ କୋଟି କୋଟି ଭାରତୀୟ ମାନଙ୍କର ମା । ଗୋ ରକ୍ଷାର ଅର୍ଥ ହେଲା ଇଶ୍ୱରଙ୍କର ମୂକ ସୃଷ୍ଟିର ରକ୍ଷା । ପ୍ରାଚୀନ ଋଷି ମାନେ ସେ ଯେ ବି ହୁଅନ୍ତୁ ନା କାହିଁକି ଆରମ୍ଭ ଗାଈ ଠାରୁ ହିଁ କରିଛନ୍ତି ।
ମହାତ୍ମା ଗାନ୍ଧୀ ଗୋ ରକ୍ଷାକୁ ହିନ୍ଦୁ ଧର୍ମର କେନ୍ଦ୍ରୀୟ ତତ୍ୱ ବୋଲି ମନେ କରୁଥିଲେ । ଗାଈର ମହାତ୍ମ ବିଷୟରେ ଗାନ୍ଧୀ କୁହନ୍ତି –“ ହିନ୍ଦୁ ଧର୍ମର କେନ୍ଦ୍ରୀୟ ତତ୍ୱ ଗୋରକ୍ଷା ଅଟେ । ମୁଁ ଗୋ ରକ୍ଷାକୁ ମାନବ ବିକାଶର ସବୁଠାରୁ ଅଦ୍ଭୁତ ଘଟଣା ବୋଲି ମନେ କରେ । ମୋ ଦୃଷ୍ଟିରେ ଗାଈର ଅର୍ଥ ସମ୍ପୂର୍ଣ ଅବମାନବୀୟ ଜଗତ ଅଟେ । ଗାଈ ମାଧ୍ୟମରେ ମନୁଷ୍ୟ ସମସ୍ତ ଜୀବ ଜଗତ ସହ ନିଜର ତାଦାତ୍ମ୍ୟ ସ୍ଥାପିତ କରିଥାଏ । ଗାଈକୁ ଦେବାତ୍ୱରୋପଣ ପାଇଁ କାହିଁକି ବଛାଗଲା, ଏହାର କାରଣ ସୁସ୍ପଷ୍ଟ ଅଟେ । ଭାରତରେ ଗାଈ ମନୁଷ୍ୟର ସବୁଠାରୁ ଶ୍ରେଷ୍ଠ ସହଯୋଗୀ । ତାକୁ କାମଧେନୁ କୁହାଯାଇଛି । ସେ କେବଳ କ୍ଷୀର ହିଁ ଦେଉ ନ ଥିଲା ବରଂ ତା କାରଣରୁ କୃଷି ସମ୍ଭବ ହୋଇ ପାରିଥିଲା ।
ମହାତ୍ମା ଗାନ୍ଧୀ ଗୋ ମାତାକୁ ନିଜର ଜନ୍ମଦାତ୍ରୀ ମାଙ୍କ ଠାରୁ ମଧ୍ୟ ଶ୍ରେଷ୍ଠ ମନେ କରୁଥିଲେ । ସେ କହୁଥିଲେ ଯେ ଯଦି ନିସ୍ୱାର୍ଥପର ସେବାର ଉଦାହରଣ ପୃଥିବୀ ପୃଷ୍ଠରେ ଦେଖିବାକୁ ମିଳେ ତେବେ ତାହା ଗୋ ମାତା ଠାରେ ଦେଖିବାକୁ ମିଳେ । କେବଳ ଗାନ୍ଧୀଜୀ ନୁହନ୍ତି ଦେଶର ଅନେକ ମହାପୁରୁଷ ଗୋ ରକ୍ଷାକୁ ନିଜର ପରମ କର୍ତବ୍ୟ ବୋଲି ମନେ କରିଛନ୍ତି ।
ଭାରତରେ ଗୋ ମାତା ରକ୍ଷା କରିବା ପାଇଁ ନିଜର ସର୍ବସ୍ୱ ବଳିଦାନ କରିବାର ଲମ୍ବା ପରମ୍ପରା ରହିଛି । ମହାରାଜା ଦିଲ୍ଲୀପ ନନ୍ଦିନୀ ଗାଈକୁ ରକ୍ଷା କରିବା ପାଇଁ ନିଜକୁ ବଳିଦାନ ଦେବାକୁ ପ୍ରସ୍ତୁତ ହୋଇ ଯାଇଥିଲେ । ଗୋ ହତ୍ୟା ରୋକିବା ପାଇଁ ଦେଶରେ ଅନେକ ବଡ ବଡ ଆନ୍ଦୋଳନ ହୋଇଛି । ଇଂରେଜ ମାନଙ୍କ ବିରୁଦ୍ଧରେ ଶିଖ ମାନଙ୍କ ପକ୍ଷରୁ ଯେଉଁ କୁକା ବିଦ୍ରୋହ ( Kuka Rebelion ) ହୋଇଥିଲା ତାହା ଗୋ ରକ୍ଷା ପାଇଁ ଥିଲା । ଇତିହାସରେ ଏହି କୁକା ବିଦ୍ରୋହ ସ୍ୱର୍ଣାକ୍ଷରରେ ଲିପିବଦ୍ଧ ହୋଇ ରହିଛି ଯେତେବେଳେ ଗୋମାତାର ରକ୍ଷା ପାଇଁ ଶହ ଶହ ଲୋକ ନିଜର ପ୍ରାଣବଳୀ ଦେଇଥିଲେ ।
ମହର୍ଷୀ ଦୟାନନ୍ଦଙ୍କ ( Maharsi Dayananda ) ଠାରୁ ଅନ୍ୟ ମହାପୁରୁଷ ମାନେ ଏହା ଭାରତୀୟ ସଭ୍ୟତା, ସଂସ୍କୃତି ଓ ଅର୍ଥନୀତି ପାଇଁ କେତେ ଗୁରୁତ୍ୱପୂର୍ଣ । ସ୍ୱାଧୀନ ଭାରତରେ ମଧ୍ୟ ଏହାକୁ ନେଇ ଅନେକ ଆନ୍ଦୋଳନ ହୋଉଛି । କରପାତ୍ରୀଜୀ ମହାରାଜଙ୍କ ନେତୃତ୍ୱରେ ଇନ୍ଦିରା ଗାନ୍ଧୀଙ୍କ ପ୍ରଧାନମନ୍ତ୍ରିତ୍ୱ କାଳରେ ଯେଉଁ ଆନ୍ଦୋଳନ ହୋଇଥିଲା ସେଥିରେ ଶହ ଶହ ସାଧୁ ସନ୍ଥ ଓ ସାଧାରଣ ଲୋ ପୋଲିସ ଗୁଳିର ଶୀକାର ହୋଇ ପ୍ରାଣବଳୀ ଦେଇଥିଲେ ।
ପ୍ରତ୍ୟେକ ଭାରତବାସୀଙ୍କ ମନର କଥା ଇଲାହାବାଦ ହାଇକୋର୍ଟ କହିଛନ୍ତି । ଇଲାହାବାଦ ହାଇକୋର୍ଟ ଏକ ଏପରି ପ୍ରଶ୍ନ ଉଠାଇଛନ୍ତି ଯାହା ଭାରତ, ଭାରତୀୟତା, ଭାରତୀୟ ସଂସ୍କୃତି, ଆଧ୍ୟାତ୍ମିକତା ଓ ଅର୍ଥନୀତି ସହ ଜଡିତ । ଏହି ଗୁରୁତ୍ୱପୂର୍ଣ ପ୍ରଶ୍ନ ଉଠାଇଥିବାରୁ ଇଲାହାବାଦ ହାଇକୋର୍ଟ ଧନ୍ୟବାଦର ପାତ୍ର । ତେଣୁ ତାଙ୍କର ଏହି ମନ୍ତବ୍ୟକୁ ଅତ୍ୟନ୍ତ ଗୁରୁତ୍ୱର ସହ ନେବା ଓ ଏହା ଉପରେ ସରକାର ଆବଶ୍ୟକୀୟ ପଦକ୍ଷେପ ନେବାର ସମୟ ଆସିଛି ।
ଏହି ଭଳି ଖବର ପଢିବା ପାଇଁ ଆମକୁ ଫଲୋ କରନ୍ତୁ
ଟ୍ୱିଟର – https://twitter.com/TheIndependenc4
ଫେସବୁକ - https://facebook.com/theindependence.in