ଭାରତୀୟ ସାମରିକ ପ୍ରଶିକ୍ଷଣରେ ସାମିଲ ହୋଇ ପାରେ ଭାରତର ପ୍ରାଚୀନ ସାହିତ୍ୟ । ପ୍ରତିରକ୍ଷା ଅଧିକାରୀ ମାନଙ୍କ ମଧ୍ୟରେ ନେତୃତ୍ୱ କ୍ଷମତା ବିକଶିତ କରିବା ପାଇଁ କାମ କରୁଥିବା ସିକନ୍ଦରାବାଦ ସ୍ଥିତ କଲେଜ ଅଫ ଡିଫେନ୍ସ ମ୍ୟାନେଜମେଂଟ ( College of Defence Management ) ଭାରତ ସରକାରଙ୍କୁ କିଛି ଗୁରୁତ୍ୱପୂର୍ଣ ପରାମର୍ଶ ଦେଇଛି । ଏହି ପରାମର୍ଶକୁ ( Attributes of Ancient Indian Culture, Warfare Techniques ) ସ୍ୱୀକାର କରାଗଲେ ପ୍ରତିରକ୍ଷା ବ୍ୟବସ୍ଥାର ଭାରତୀୟକରଣ କରିବାରେ ସହାୟତା ମିଳିବ । କଲେଜ ଅଫ ଡିଫେନ୍ସ ମ୍ୟାନେଜମେଂଟ ଦେଇଥିବା ପରାମର୍ଶରେ କହିଛି ଯେ ପ୍ରତିରକ୍ଷା ଅଧିକାରୀ ମାନଙ୍କୁ ଦିଆ ଯାଉଥିବା ପ୍ରଶିକ୍ଷଣ ପାଠ୍ୟକ୍ରମରେ ପ୍ରାଚୀନ ଭାରତୀୟ ସାହିତ୍ୟକୁ ସାମିଲ କରା ଯିବା ଉଚିତକୁରୁକ୍ଷେତ୍ରରେ ଭଗବାନ ଶ୍ରୀକୃଷ୍ଣଙ୍କ ମୁଖ ନିସୃତ ଭଗବତ ଗୀତା ( Bhagavat Gita ), କୌଟିଲ୍ୟଙ୍କ ରଚିତ ଅର୍ଥଶାସ୍ତ୍ର ( Arthashastra ) ଓ ତିରୁବଲ୍ଲୁବରଙ୍କ ରଚିତ ତିରୁକୁରଲ କୁ ଏହି ପାଠ୍ୟକ୍ରମରେ ସାମିଲ କରିବାକୁ ପରାମର୍ଶ ଦିଆ ଯାଇଛି । ଏହା ବ୍ୟତୀତ ଭାରତୀୟ ସଂସ୍କୃତି ଅଧ୍ୟୟନ ଫୋରମ ( Indian Cultural Study Forum ) ତିଆରି କରିବାକୁ ମଧ୍ୟ ପ୍ରସ୍ତାବ ଦିଆ ଯାଇଛି । ଏହା ସହିତ ଭାରତୀୟ ସଂସ୍କୃତି କ୍ଲବ ( Indian Culture Club ) ପ୍ରତିଷ୍ଠା କରିବାକୁ ମଧ୍ୟ ପରାମର୍ଶ ଦିଆ ଯାଇଛି । ଏହି କ୍ଲବ ଜରିଆରେ ପ୍ରାଚୀନ ଭାରତୀୟ ସାହିତ୍ୟକୁ ଉପଲବ୍ଧ କରାଇବା ସହ ଏହା ସହ ସମ୍ପର୍କିତ ରିସର୍ଚ ସାମଗ୍ରୀ ଅନଲାଇନ ଜରିଆରେ ଉପଲବ୍ଧ କରାଯାଇ ପାରିବ । ସେହିପରି ପ୍ରାସଙ୍ଗିକ ବିଷୟ ଗୁଡିକରେ ପ୍ୟାନେଲ ଡିସକସନ ଓ ଗେଷ୍ଟ ଲେକଚରର ମଧ୍ୟ ଆୟୋଜନ କରାଇବାକୁ ପ୍ରସ୍ତାବ ଦିଆ ଯାଇଛି । ଏହି ଭଗବତ ଗୀତା ଓ ଅର୍ଥ ଶାସ୍ତ୍ର ଭଳି ପ୍ରାଚୀନ ଭାରତୀୟ ସାହିତ୍ୟ ରେ ରଣନୈତିକ ବିଚାର, ଯୁଦ୍ଧ କଳା କୌଶଳ, ଯୁଦ୍ଧ ମନୋବିଜ୍ଞାନ ସମ୍ପର୍କିତ ଅନେକ ଜିନିଷ ରହିଛି । ଏହା ଆଜି ମଧ୍ୟ ପ୍ରାସଙ୍ଗିକ । ତେଣୁ ନେତୃତ୍ୱ ବିକାଶ, ଯୁଦ୍ଧ ରଣନୀତି, ରଣନୈତିକ ଚିନ୍ତନ ଆଦି ବିଷୟରେ ଏହି ପ୍ରାଚୀନ ସାହିତ୍ୟର ଉପଯୋଗ କରିବା ଭାରତୀୟ ପ୍ରତିରକ୍ଷା ବ୍ୟବସ୍ଥା ପାଇଁ ଶୁଭଙ୍କର ହେବ । ନରେନ୍ଦ୍ର ମୋଦି ସରକାର କ୍ଷମତାରେ ଆସିବା ପରେ ସେନା, ସାମରିକ ବ୍ୟବସ୍ଥାର ଭାରତୀୟକରଣ ଉପରେ ଖୁବ ଅଧିକ ଗୁରୁତ୍ୱ ଦେଉଥିବାରୁ ଖୁବ ଶୀଘ୍ର ଏହି ପ୍ରାଚୀନ ଭାରତୀୟ ସାହିତ୍ୟକୁ ପାଠ୍ୟକ୍ରମରେ ସାମିଲ କରା ଯିବା ନେଇ ଅନୁମାନ କରା ଯାଉଛି ।