ଏବେ ଚାଲିଛି ପଂଚାୟତ ନିର୍ବାଚନ । ରାଜ୍ୟରେ ପଂଚାୟତ ନିର୍ବାଚନ ସରୁ ସରୁ ହୋଇପାରେ ପୌର ନିର୍ବାଚନ । ରାଜ୍ୟରେ ଯେଉଁ ୫ଟି ପୌର ନିଗମ ରହିଛି ସେଥିରେ ଭୁବନେଶ୍ୱର ପରେ କଟକ ହେଉଛି ସବୁଠାରୁ ଗୁରୁତ୍ୱପୁର୍ଣ୍ଣ ପୌର ନିଗମ । ଭୁବନେଶ୍ୱରର ମେୟର ପଦବୀ ମହିଳାଙ୍କ ପାଇଁ ସଂରକ୍ଷିତ ହୋଇରହିଥିବା ବେଳେ କଟକ କିନ୍ତୁ ଅଣସଂରକ୍ଷିତ ହୋଇଛି । ରାଜନୈତିକ ଦୃଷ୍ଟିରୁ ବହୁ ଗୁରୁତ୍ୱ ବହନ କରୁଥିବା ଏହି କଟକ ସହରର ରାଜନୀତି ଟିକିଏ ନିଆରା । ଦିନ ଥିଲା କଟକ ଓଡିଶାର ରାଜନୈତିକ ପ୍ରାଣକେନ୍ଦ୍ର ଥିଲା । ସଚିବାଳୟ, ବିଧାନସଭା ଭୁବନେଶ୍ୱରରେ ଥାଇ ବି ମୁଖ୍ୟମନ୍ତ୍ରୀ, ଅନ୍ୟ ମନ୍ତ୍ରୀମାନେ ରହୁଥିଲେ କଟକରେ ।
କଟକର ମେୟର ପଦବୀ ପାଇଁ ବିଭିନ୍ନ ରାଜନୈତିକ ଦଳମାନେ ଏବେ ଠାରୁ ଅଙ୍କକଷା ଆରମ୍ଭ କରିସାରିଲେଣି । ମଇଦାନରେ ମୁଖ୍ୟତଃ ବିଜେଡି, ବିଜେପି, କଂଗ୍ରେସ ଦୃଶ୍ୟମାନ ହେଉଥିବା ବେଳେ କିଏ ଜିତିବ ଏହା ଅନୁମାନ କରିବା କଷ୍ଟକର ବ୍ୟାପାର । କଟକ ସହରର ତିନୋଟି ବିଧାୟକ ଆସନରୁ ଦୁଇଟି ଏବେ ବିଜେଡି କବଜାରେ ଓ ଗୋଟିଏ କଂଗ୍ରେସ ହାତରେ ରହିଛି । ସେହିପରି ସାଂସଦ ପଦ ବିଜେଡିର କବଜାରେ ରହିଛି । ଗତ ସାଧାରଣ ନିର୍ବାଚନରେ ପ୍ରାୟ ସମସ୍ତ ଆସନରେ ତ୍ରିମୁଖି ଲଢାଇ ହୋଇଥିଲା । ବିଜେପିର ସାଂସଦ ପାର୍ଥୀ ଭାବରେ ମଇଦାନରେ ଲଢୁଥିଲେ ପୂର୍ବତନ ପୋଲିସ ଡିଜି ପ୍ରକାଶ ମିଶ୍ର । ତେଣୁ ଏମିତିରେ ଦେଖିଲେ କଟକ ମେୟର ପଦବୀ ପାଇଁ ଲଢାଇ ତିନୋଟି ଯାକ ମୁଖ୍ୟ ରାଜନୈତିକ ଦଳ ଭିତରେ ହେବ ।
ଯେହେତୁ ଏଥରର ନିର୍ବାଚନ ପ୍ରତ୍ୟକ୍ଷ ହେବ ତେଣୁ ଲଢାଇ ସିଧାସଳଖ ଦଳମାନଙ୍କ ଭିତରେ ହେବ ଓ ହେଭିେଓଟମାନେ ନିର୍ବାଚନ ଲଢିବେ । ଭାଇଚାରାର ସହର କଟକରେ ଯିଏବି ମେୟର ପାଇଁ ଲଢିବେ ସେ ପୁରା କଟକିଆ ହୋଇଥିବା ଦରକାର । ନହେଲେ କଟକରେ ଭୋଟ ମିଳିବନି ।
କଟକରେ ବିଜେଡିର ପାର୍ଥୀ ତାଲିକାରେ ବହୁ ଆଶାୟୀ ଅଛନ୍ତି । ବିଜେଡି ପୁର୍ବତନ ବିଧାୟକ ପ୍ରଭାତ ବିଶ୍ୱାଳଙ୍କୁ ବି ପାର୍ଥୀ କରିବାରେ କିଛି ଆଶ୍ଚର୍ଯ୍ୟ ହେବାର ନାହିଁ । ସେହିପରି ସିନେଷ୍ଟାର ଅରିନ୍ଦମ ରାୟଙ୍କୁ ବିଜେଡିର ସାଧାରଣ ସମ୍ପାଦକ ନିଯୁକ୍ତ କରିବା ପଛରେ କଟକ ମେୟର ପଦବୀ ଲଢିବାର ବାସ୍ନା ବାହାରୁଛି । ଅରିନ୍ଦମଙ୍କ ଘର ମଧ୍ୟ କଟକରେ । ଆଶାୟୀ ତାଲିକାରେ ବହୁ ପୁର୍ବତନ ମେୟର, ପୁର୍ବତନ କର୍ପୋରଟର ମଧ୍ୟ ଅଛନ୍ତି ।
ବିଜେପିର ପାର୍ଥୀ କିଏ ହେବ ତାହା ଅସ୍ପଷ୍ଟ ଥିଲେ ବି ସୀନେଷ୍ଟାର ଶ୍ରୀତମ ଦାସ ପାର୍ଥୀ ହୋଇପାରନ୍ତି ବୋଲି କଟକରେ ଚର୍ଚ୍ଚା ଚାଲିିଛି । ଏମିତିରେ ଶ୍ରୀତମ ଦାସ ବିଜେପିର ନୁଆ ନୁହନ୍ତି କି ରାଜନୀତିରେ ବି ନୁଆ ନୁହନ୍ତି । ଗତ ସାଧାରଣ ନିର୍ବାଚନରେ ସେ ବିଜେପି ପାଇଁ ପ୍ରଚାର କରୁଥିଲେ । ଯଦିଓ ବିଜେପିରେ ଆହୁରି ଅନେକ ହେଭିେଓଟ କଟକରେ ଅଛନ୍ତି ତଥାପି ଲୋକପ୍ରିୟତା, ସିନେଷ୍ଟାର କ୍ରେଜ ଆଦିକୁ ହିସାବକୁ ନେଲେ ଶ୍ରୀତମ ଦାସ ଟିକେଟ ରେସରେ ଆଗରେ ରହିବେ ।
ବାକି କଂଗ୍ରେସର ପାର୍ଥୀ କିଏ ହେବେ ତାହା ନିର୍ଭର କରୁଛି ବିଧାୟକ ମୋକିମଙ୍କ ନିଷ୍ପତି ଉପରେ । ମୋକିମଙ୍କ ଝିଅ ବି ଧୀରେ ଧୀରେ ରାଜନୀତିରେ ରୁଚି ରଖିଲେଣି । କଂଗ୍ରେସରେ ଆହୁରି ବି ଅନେକ ପୁରୁଖା ନେତାମାନେ ଅଛନ୍ତି ଯାହାଙ୍କୁ କଂଗ୍ରେସ ମଇଦାନରେ ଉତାରି ପାରେ ।