ଯାହା ହେଉ ଏବେ ଓଡିଶା ସରକାର ଦୁର୍ଗା ମାଙ୍କର ଉଚ୍ଚତାକୁ ବି ମାପିଲେଣି । ଉଚ୍ଚତା ୪ ଫୁଟରୁ ଅଧିକ ହେଲେ କୁଆଡେ କୋଭିଡ ବଢିଯିବ ବୋଲି ସରକାରଙ୍କର ସଚିବ ବି ଗଣମାଧ୍ୟମରେ ବୟାନ ଦେଲେଣି । ଏନେଇ ସାମାଜିକ ଗଣମାଧ୍ୟମରେ ସାଧାରଣ ଲୋକମାନେ ନିଜର ଅସନ୍ତୋଷ ଦେଖାଉଛନ୍ତି, ସାମାଜିକ ସଙ୍ଗଠନମାନେ ରାସ୍ତାକୁ ଆସି ଆନ୍ଦୋଳନ ବି କରିଛନ୍ତି । ହେଲେ ସରକାର ଏହା ମାନିବାକୁ ନାରାଜ । ସରକାରଙ୍କର ଜିଦ ଯେ ଯାହାବି ହେଇଯାଉ କିନ୍ତୁ ଦୁର୍ଗା ମାଙ୍କର ମୁର୍ତୀ ଉଚ୍ଚତା ୪ ଫୁଟରୁ ଅଧିକ ହେବ ନାହିଁ ।
ସରକାରଙ୍କର କାମ ହେଉଛି ଆଇନ ଶୃଙ୍ଖଳା, ଶୀକ୍ଷା, ସ୍ୱାସ୍ଥ୍ୟ, ଗମନା ଗମନ, ଶିଳ୍ପ, ଅର୍ଥନୀତିକୁ ସୁଧାରିବା । ଏସବୁଥିରେ ସରକାର କେତେ ସଫଳ ତାହା ସମସ୍ତେ ଜାଣନ୍ତି, ଅଧିକ କିଛି କହିବାର ଆବଶ୍ୟକତା ନାହିଁ । ହେଲେ ସରକାର ଯଦି ଲୋକମାନଙ୍କର ଧାର୍ମୀକ ଭାବନା ଉପରେ ବାରମ୍ବାର ଆଘାତ କରନ୍ତି ଓ ନିର୍ବୋଧତାରେ ନେଇଥିବା ନିଷ୍ପତିକୁ ଠିକ ଦେଖାଇବା ପାଇଁ ଆହୁରି ନିର୍ବୋଧତା ଦେଖାନ୍ତି, କ୍ଷମତାରେ ଅଛନ୍ତି ବୋଲି ନିଜକୁ ସବୁବେଳେ ଠିକ ବୋଲି ଭାବନ୍ତି ତାହେଲେ ଏହା ଗ୍ରହଣୀୟ ହେବ କି ?
ଏମିତିରେ ସମ୍ବିଧାନ ଅନୁସାରେ ସରକାର ହେଉଛନ୍ତି ସେକୁଲାର ( ପନ୍ଥ ନିରପକ୍ଷ ) । ସେକୁଲାର ବିଚାର ଅନୁସାରେ ସରକାର କୌଣସି ଧର୍ମାନୁଷ୍ଠାନ ସହିତ ଜଡିତ ହେବେ ନାହିଁ କି କୌଣସି ଧାର୍ମିକ ପ୍ରକିୟାରେ ଭାଗ ନେବେ ନାହିଁ । ଖାଲି ସେତିକି ନୁହେଁ ରାଜ୍ୟ ସରକାଙ୍କର ସଚିବ ତାଙ୍କର ସାମ୍ବାଦିକ ସମ୍ମିଳନୀରେ କେରଳର ଓନାମ ପର୍ବ ପାଇଁ କେରଳରେ କୋଭିଡ ସଂଖ୍ୟା ବଢିଲା ବୋଲି କହିଲେ । ହେଲେ ବାସ୍ତବରେ କେରଳରେ ଇଦ ପରଠାରୁ ( ଜୁଲାଇ ମାସ ) କୋଭିଡ ସଂଖ୍ୟାରେ ବୃଦ୍ଧି ୪୦୦% ହାରରେ ବଢିଥିଲା । ହେଲେ ଓଡିଶା ସଚିବଙ୍କର ପାଟିରେ କେବଳ ଓନାମ ପର୍ବ ହିଁ ପଶିଲା ।
ଯିଏ ନିଜକୁ ଦୁର୍ବଳ ଭାବିବ, ଅନ୍ୟାୟ ବିରୋଧରେ ପ୍ରତିବାଦ ନକରି ଚୁପଚାପ ସହିଯିବ ତାର ଉପରି ହିଁ ସମସ୍ତେ ରାଜୁତି କରିବେ । ଏପରି ସ୍ଥିତି ହୋଇଛି ଓଡିଶାରେ ହିନ୍ଦୁମାନଙ୍କର । ରତ୍ନ ଭଣ୍ଡାର ଚାବି ହଜିବା, ବ୍ରହ୍ମ ବିଭ୍ରାଟ, ମନ୍ଦିରମାନଙ୍କର ଜମି ଲୁଟ, ସ୍ୱର୍ଗ ଦ୍ୱାର ଜମି ଲୁଟ, ଧର୍ମଶାଳାର ଜମିକୁ ହୋଟେଲ ମାଲିକଙ୍କୁ ବିକିବା, ପୁରାତନ ମଠ ଭଙ୍ଗା କଣ ନହୋଇଛି ଓଡିଶାରେ । ହେଲେ ନା କେବେ ଶକ୍ତ ପ୍ରତିବାଦ ହୋଇପାରିଛି ନା ସରକାର ଚେତିଛନ୍ତି । ବିରୋଧୀମାନେ ତ କେବଳ ସାମ୍ବାଦିକ ସମ୍ମିଳନୀ କରିବାକୁ ନିଜର ପରମ ଦାୟିତ୍ୱ ମାନିନେଇଛନ୍ତି । ଗତ ବର୍ଷ ରଥଯାତ୍ରାକୁ ବନ୍ଦ କରିବା ପାଇଁ ରାଜ୍ୟ ସରକାର ଏକ ପ୍ରକାର ନିଷ୍ପତି ନେଇଥିଲେ । ହେଲେ ଯାହା ହେଉ ଗଜପତି ମହାରାଜ ମୁହଁ ଖୋଲିବା ପରେ, ରାଜ୍ୟ ଓ କେନ୍ଦ୍ର ସରକାର ଏନେଇ ସୁପ୍ରିମକୋର୍ଟରେ ଆବେଦନ କରିବା ପରେ ଅନୁମତି ମିଳିଥିଲା ରଥଯାତ୍ରା ପାଇଁ ।