ଆଉ ପାଖାପାଖି ଅଢେଇ ବର୍ଷ ଅଛି ସାଧାରଣ ନିର୍ବାଚନ । ତଥାପି ଏବେଠାରୁ ରଣନୀତି ଆରମ୍ଭ ହେଲାଣି ୨୦୨୪ ସାଧାରଣ ନିର୍ବାଚନ ପାଇଁ । ଓଡିଶାରେ ଅନ୍ୟ ଦଳରୁ ନେତାଙ୍କୁ ଆମଦାନୀ ଆଣି ଟିକେଟ ଦେବାର ପରମ୍ପରା ବିଗତ ତିନି ଚାରୋଟି ନିର୍ବାଚନରେ ଆରମ୍ଭ ହୋଇ ଅତି ଜୋରସୋରରେ ହେଉଛି । ଏହା ଏବେ ଏକ ରାଜନୈତିକ ରଣକୌଶଳ ବୋଲି ପରିଗଣିତ ହେଉଛି । ଏବେ ଅବିଭକ୍ତ କୋରାପୁଟରେ ବି ଦଳବଦଳକକୁ ନେଇ ଆରମ୍ଭ ହେଲାଣି କସରତ ।
ଯାହା ବିଶ୍ୱସ୍ତ ସୁତ୍ରରୁ ସୂଚନା ମିଳୁଛି ଓ ଅବିଭକ୍ତ କୋରାପୁଟର ରାଜନୈତିକ ଗତିବିଧିରୁ ଯାହା ଜଣାପଡୁଛି ୨୦୨୪ ନିର୍ବାଚନର ପୁର୍ବରୁ ଅନେକ ଦଳ ବଦଳ ଦେଖିବାକୁ ମିଳିବ । ଖାଲି ସେତିକି ନୁହେଁ, ବିଗତ ଦିନରେ ଯେଉଁ ମାନେ ଯେଉଁ ଦଳକୁ କଡା ବିରୋଧ କରୁଥିଲେ ସେମାନେ ସେହି ଦଳରୁ ଟିକେଟ ନେଇ ନିର୍ବାଚନ ଲଢିବେ ।
ଅବିଭକ୍ତ କୋରାପୁଟରେ ରହିଛି ଦୁଇଟି ଲୋକସଭା ଆସନ ଓ ୧୪ଟି ବିଧାନସଭା ଆସନ । ସ୍ୱାଧୀନତାଠାରୁ ପାଖାପାଖି ୨୦୦୯ ପର୍ଯ୍ୟନ୍ତ କୋରାପୁଟ ଲୋକସଭା ଆସନରେ କଂଗ୍ରେସହିଁ ଜିତିଜିତି ଆସୁଥିଲା । ସେହିପରି ୧୯୯୯ ପର୍ଯ୍ୟନ୍ତ ନବରଙ୍ଗପୁର ଆସନ କଂଗ୍ରେସ କବଜାରେ ଥିଲା ।
ଜାତୀୟ ଜରୁରୀ କାଳିନ ପରିସ୍ଥିତି ହେଉ କି ବୋଫର୍ସ ହେଉ, ଯେତେବେଳେ ଦେଶରେ କଂଗ୍ରେସୀ ବିରୋଧୀ ହାଓା ଥାଏ ଏଠାରେ କିନ୍ତୁ କଂଗ୍ରେସ ବହୁ ବ୍ୟବଧାନରେ ଜିତେ । ଏବେ କୋରାପୁଟ ଆସନରେ କଂଗ୍ରେସ ଜିତିଥିବା ବେଳେ ନବରଙ୍ଗପୁର ଆସନରେ ବି ପ୍ରଦିପ ମାଝି ବିଜେଡିକୁ କଡା ଟକ୍କର ଦେଇଥିଲେ । ଏବେ ଯାହା ଶୁଣିବାକୁ ମିଳୁଛି ସେହି ଦୁଇଟି ଯାକ ଲୋକସଭା ଆସନର ଅନେକ କଂଗ୍ରେସ ନେତା ଏବେ ଦଳଛାଡିବା ପାଇଁ ଯାଉଛନ୍ତି ।
କେବଳ କଂଗ୍ରେସ ନୁହେଁ ବିଜେପିରୁ ମଧ୍ୟ କିଛି ନେତା ଦଳ ଛାଡିବେ ଓ ବିଜେଡିରୁ ମଧ୍ୟ କିଛି ନେତା ଦଳ ଛାଡିବେ । ବିଜେଡିରୁ ଛାଡିବା ପଛରେ ବଡ କାରଣ ହେବ ଅନ୍ୟ ଦଳରୁ ଆସିଥିବା ପାରମ୍ପାରିକ ନେତାଙ୍କୁ ବିଜେଡି ଟିକେଟ ଦେବା । ସେମାନେ ନିର୍ବାଚନ ଲଢିବା ପାଇଁ ଦଳ ଛାଡିବେ ।
ଏହି ଚର୍ଚ୍ଚାରେ ଆଗରେ ଅଛନ୍ତି ପ୍ରଦୀପ ମାଝି, ତାରା ବାହିନି ପତି, ଗିରିଧର ଗମାଙ୍ଗୋ ଓ ତାଙ୍କ ପୁଅ ଶିଶିର ଗମାଙ୍ଗୋ, ଜୟରାମ ପାଙ୍ଗୀ ଓ ତାଙ୍କ ପୁଅ, ବଳଭଦ୍ର ମାଝୀ, ଶିବଶଙ୍କର ଉଲାକା, କୃଷ୍ଣଚନ୍ଦ୍ର ସଗରିଆ, ଧରମୁ ଗଣ୍ଡ, ଭୁଜବଳ ମାଝୀ, ମକରନ୍ଦ ମୁଦୁଲି(ସ୍ୱାଧୀନ) ଆଦି । ଏମାନଙ୍କୁ ଭିତରୁ ଯେ ସମସ୍ତେ ଶତ ପ୍ରତିଶତ ଦଳବଦଳ କରିବେ ଏକଥା ଗ୍ୟାରେଂଟି ଦିଆଯାଇପାରିବ ନାହିଁ କିନ୍ତୁ ଏମାନେ ଅନ୍ୟ ଦଳ ସହିତ ଯୋଗାଯୋଗରେ ଅଛନ୍ତି ।
ଯଦିଓ ପ୍ରଦୀପ ମାଝି ସ୍ପଷ୍ଟ କରିଛନ୍ତି ଯେ, ସେ ରାହୁଲ ଗାନ୍ଧୀଙ୍କ ସହିତ ଆଲୋଚନା କରିଛନ୍ତି ଓ ଦଳଛାଡିକି ଯିବେ ନାହିଁ ବୋଲି କିନ୍ତୁ ଅତୀତରେ ଦେଖାଯାଇଛି ଯେ ରାହୁଲ ଗାନ୍ଧୀଙ୍କର ସହିତ ଯେଉଁମାନେ ଆଲୋଚନା କରିଛନ୍ତି ସେମାନେ ସମସ୍ତେ କଂଗ୍ରେସ ଦଳ ଛାଡିକି ଯାଇଛନ୍ତି । ପ୍ରଦୀପ ମାଝି ବିଜେଡି ଯିବେ ଏକଥା ଅନେକ ଦିନ ହେଲାଣି ଆଲୋଚନା ହେଉଛି ।
ବିଜେପିରେ ଗିରିଧର ଗମାଙ୍ଗୋ ଏବେ ଏକ ପ୍ରକାର ଅଲୋଡା ବା ସେହି ଦଳରେ ସେ ନିଜକୁ ଖାପଖୁଆଇ ପାରୁନାହାନ୍ତି । ୨୦୧୯ରେ ବିଜେପି ଜୟରାମ ପାଙ୍ଗୀଙ୍କୁ କୋରାପୁଟ ଲୋକସଭା ଆସନରେ ଟିକେଟ ଦେଇଥିଲା । ଗିରିଧରଙ୍କର ଦାବି ହେଲା ଯେ ସେ ଲଢିଥିଲେ ଅଧିକ ଭୋଟ ପାଇଥାନ୍ତେ । ଗିରିଧର ଗମାଙ୍ଗୋଙ୍କର କୋରାପୁଟ ରାଜନୀତିରେ ଏବେବି ପ୍ରଭାବ ଅଛି ଓ ଲୋକଙ୍କ ଭଲପାଇବା ତାଙ୍କ ପ୍ରତି ଅଛି । କିନ୍ତୁ ତାଙ୍କ ପୁଅ ଶିଶିର, ଗିରିଧରଙ୍କର ଲିଗାସିକୁ ନେଇପାରୁନାହାନ୍ତି । ଏଥିପାଇଁ ଚିନ୍ତାରେ ଗିରିଧର ।
ଶିଶିର ଗମାଙ୍ଗୋ ଗତ ୨୦୧୯ ନିର୍ବାଚନରେ ଗୁଣୁପୁରରୁ ବିଜେପି ଟିକେଟରେ ମାତ୍ର ୧୬ ହଜାର ଭୋଟ ପାଇଥିଲେ । ତେଣୁ ସେ ବିଜେପି ଟିକେଟରେ କେବେ ନିର୍ବାଚନ ଜିତିବେ ଏକଥା ଗିରିଧର ବିଶ୍ୱାସ କରୁନାହାନ୍ତି । ତେଣୁ ସେ ପୁଅ ପାଇଁ ବିଜେପି ଛାଡି ପାରନ୍ତି, ପୁଣି କଂଗ୍ରେସ ଫେରିପାରନ୍ତି ।
ତାରାବାହିନି ପତି ମଧ୍ୟ ଏବେ କଂଗ୍ରେସର ଉଭୟ କେନ୍ଦ୍ର ଓ ରାଜ୍ୟ ନେତୃତ୍ୱଙ୍କର ଆକ୍ରୋଶରେ । ଆକ୍ରୋଶର କାରଣ ତାରାଙ୍କର ଖୋଲାଖୋଲା ବାଣ । ଏମିତିରେ ତାରାଙ୍କୁ ବିଧାୟକ ଥାଇବି ୨୦୦୯ରେ କଂଗ୍ରେସ ଟିକେଟ ଦେଇନଥିଲା ଓ ସେ ବିଜେପି ଆସନରୁ ଲଢିଥିଲେ, ଭଲ ଭୋଟବି ପାଇଥିଲେ । ତାରାଙ୍କର ଯେଉଁ ରାଜନୈତିକ ପତିଆରା ଅଛି ବିଶେଷ ଭାବରେ କୋରାପୁଟରେ ସେ ଦଳ ଛାଡିବା କଂଗ୍ରେସ ପାଇଁ କ୍ଷତି କରିବ । ଯେହେତୁ ଜୟପୁର ଆସନରେ ରବି ନନ୍ଦ ଓ ତାଙ୍କ ପୁଅ ଅଛନ୍ତି ତାରା ବିଜେପିକୁ ଯାଇପାରନ୍ତି ।
ଜୟରାମ ପାଙ୍ଗୀ ଘୋଷଣା କରିସାରିଲେଣି ସେ ରାଜନୀତି ଛାଡିଦେବେ ଓ ସାମାଜିକ କାର୍ଯ୍ୟକ୍ରମରେ ସାମିଲ ହେବେ । ଏହା ପଛରେ ବି ରାଜନୀତି ଅଛି । ତାଙ୍କ ପୁଅ ଯିଏ ଏବେ ପଟାଙ୍ଗୀ ବ୍ଲକରେ ଚେୟାରମ୍ୟାନ ଅଛନ୍ତି ସେ ବିଜେଡିକୁ ଯିବେ ବୋଲି ଏକ ପ୍ରକାର କଥାବାର୍ତା ସରିଛି ବୋଲି ଆଲୋଚନା ହେଉଛି ।
ବାକି ବଳଭଦ୍ର ମାଝୀ, ଶିବଶଙ୍କର ଉଲାକା, କୃଷ୍ଣଚନ୍ଦ୍ର ସଗରିଆ, ଧରମୁ ଗଣ୍ଡ, ଭୁଜବଳ ମାଝୀ, ମକରନ୍ଦ ମୁଦୁଲି ଆଦି ନେତାମାନେ ଅନ୍ୟ ଦଳ ସହିତ ଯୋଗାଯୋଗରେ ଅଛନ୍ତି । ଏବେ ନହେଲେ ବି ୨୦୨୪ର ପୁର୍ବରୁ ଏମାନେ ଦଳବଦଳ କରିପାରନ୍ତି । ଏମାନେ ସମସ୍ତେ ଆଗରୁ ଦଳବଦଳ କରିଛନ୍ତି ଓ ଦଳବଦଳର ଅଭିଜ୍ଞତା ଅଛି ସେମାନଙ୍କର ।
ଯାହା ଅନୁମାନ କରାଯାଉଛି ଆସନ୍ତା ୨୦୨୪ ନିର୍ବାଚନରେ ଅବିଭକ୍ତ କୋରାପୁଟର ରାଜନୀତି ଏତେ ଗୋଳମାଳିଆ ହେବ ଯେ ଭୋଟର ଓ କର୍ମୀ ବି ବାଉଳା ହୋଇଯିବେ କିଏ କେଉଁ ଦଳରେ ନିର୍ବାଚନ ଲଢୁଛନ୍ତି ବୋଲି ।