Odisha Panchayat Election ରେ କିଏ ଭଲ ପ୍ରଦର୍ଶନ କରିଛି, କିଏ କେତେ ଭୋଟରଙ୍କୁ ହରାଇଲେ, କାହା ହାତରୁ କେତେ ଆସନ ଖସିଲା ସେସବୁକୁ ନେଇ ରାଜନୈତିକ ମହଲରେ ତର୍ଜମା ଆରମ୍ଭ ହୋଇଛି। କିଏ ୨୦୧୭ ତୁଳନାରେ ସଦ୍ୟ ସମାପ୍ତ ପଞ୍ଚାୟତ ନିର୍ବାଚନ ଫଳାଫଳର ତର୍ଜମା କଲେଣି; ଆଉ କିଏ ୨୦୧୯ ନିର୍ବାଚନ ପରିସଂଖ୍ୟାନ ଧରି ଆତ୍ମରକ୍ଷା ପାଇଁ ରାସ୍ତା ଖୋଜୁଛନ୍ତି।
୨୦୧୭ ତୁଳନାରେ ୨୦୨୨ ପଞ୍ଚାୟତ ନିର୍ବାଚନରେ ବିଜୁ ଜନତା ଦଳର ଭୋଟ ୧୦.୫୫% ବଢ଼ିଛି; ଦଳ ଖାତାକୁ ୨୯୦ ଆସନ ଅଧିକ ଯାଇଛି। ଯଦି ୨୦୧୯ ବିଧାନସଭା ନିର୍ବାଚନର ମତଦାନ ହାର ସହିତ ପଞ୍ଚାୟତ ନିର୍ବାଚନର ଭୋଟରଙ୍କ ରାୟର ଏକ ତୁଳନାତ୍ମକ ଚିତ୍ର ଅଙ୍କାଯିବ, ତେବେ ଶାସକ ଦଳ ଗାଁ ଭୋଟରଙ୍କ ଆସ୍ଥା ଜିଣିଛନ୍ତି। ୨୭ଲକ୍ଷ ୩୬ ହଜାର ୪୨୭ ଅଧିକ ଭୋଟ ବିଜେଡି ଖାତାକୁ ଯାଇଛି।
୨୦୧୭ରେ Biju Janata Dal ଦଳକୁ ୮୩ଲକ୍ଷ ୫୩ ହଜାର ୨୮୫ ଭୋଟ ମିଳିଥିଲା। ଏଥର ଏହା ବୃଦ୍ଧି ପାଇ ୧କୋଟି ୧୦ଲକ୍ଷ ୮୯ ହଜାର ୭୧୨ରେ ପହଞ୍ଚିଛି। ସେହିଭଳି 2019 Odisha Assembly Election ତୁଳନାରେ ୬.୯% ଏବଂ ଲୋକସଭା ଭୋଟ ହାର ତୁଳନାରେ ବିଜେଡିକୁ ୪.୦୨%ଅଧିକ ମତ ମିଳିଛି।
୨୦୧୭ ନିର୍ବାଚନରେ BJP ଙ୍କୁ ୬୭ଲକ୍ଷ ୬୧ ହଜାର ୪୯୬ ଭୋଟ ମିଳିଥିଲା। ଏଥର ୪ଲକ୍ଷ ୩୭ ହଜାର ୭୫୦ ଭୋଟର ବିଜେପିରୁ ମୁହଁ ଫେରାଇ ନେଇଛନ୍ତି। ଭୋଟ ପ୍ରତିଶତରେ ଦେଖିଲେ ୨୦୧୭ରେ Odisha BJP ଦଳକୁ ୩୪.୧୨% ଭୋଟ ମିଳିଥିଲା। ଏଥର ୪.୦୨ ପ୍ରତିଶତ ହ୍ରାସ ଘଟିଛି। ୨୦୧୯ ବିଧାନସଭା ନିର୍ବାଚନକୁ ମାପକ ଭାବେ ନେଲେ ୨.୫% ଏବଂ ଲୋକସଭା କ୍ଷେତ୍ରରେ ୮.୨୭% ପ୍ରତିଶତ ଭୋଟର ଗେରୁଆ ଦଳକୁ ମୁହଁ ମୋଡ଼ି ଦେଇଛନ୍ତି। ଦଳ ୨୫୫ ଜିଲ୍ଲା ପରିଷଦ ଆସନ ହରାଇଲା।
୧୩.୬%ଗାଁ ଲୋକ ତଥାପି କଂଗ୍ରେସ ସହିତ ଅଛନ୍ତି। ୨୦୧୭ ନିର୍ବାଚନ ମାତ୍ର ପାଞ୍ଚବର୍ଷ ବ୍ୟବଧାନରେ କଂଗ୍ରେସ ୨୩ଟି ଜିଲ୍ଲା ପରିଷଦ ଆସନ ହରାଇଛି ଏବଂ ଗାଁରେ ୫.୦୪% ଲୋକଙ୍କ ସମର୍ଥନ ହରାଇଛି। ୨୦୧୯ ବିଧାନସଭା ନିର୍ବାଚନ ଭୋଟ ହାର ସହିତ ତୁଳନା କଲେ ୩.୧% ଏବଂ ଲୋକସଭା କ୍ଷେତ୍ରରେ ୧.୧୩% ଭୋଟର କଂଗ୍ରେସକୁ ଆଉ ଭୋଟ ଦେବାକୁ ଚାହିଁନାହାନ୍ତି।