1990 ଦଶକରେ ଜାମ୍ମୁ କାଶ୍ମୀରରେ କାଶ୍ମୀରୀ ହିନ୍ଦୁ ମାନଙ୍କ ପ୍ରତି ଇସଲାମୀ ଆତଙ୍କବାଦୀଙ୍କ ବର୍ବରତାର କାହାଣୀ ଓ ସେମାନଙ୍କର ବିସ୍ଥାପନ ଉପରେ ଆଧାରିତ ଫିଲ୍ମ କାଶ୍ମୀର ଫାଇଲ୍ସ (KashmirFiles) ପୁଣି ଥରେ ଇସଲାମୀ କଟ୍ଟରପନ୍ଥୀଙ୍କ ଟାର୍ଗେଟରେ ଆସି ଯାଇଛି । ପୂର୍ବରୁ ଏହି ଫିଲ୍ମର ରିଲିଜକୁ ବନ୍ଦ କରିବାକୁ ବିବେକ ଅଗ୍ନିହୋତ୍ରୀଙ୍କୁ ଧମକ ମିଳୁଥିବା ବେଳେ ଏବେ ଏହି ଫିଲ୍ମର ରିଲିଜକୁ ରୋକିବା ପାଇଁ ବମ୍ବେ ହାଇକୋର୍ଟରେ ମାମଲା ରୁଜୁ କରାଯାଇଛି ।
ତେବେ ଫିଲ୍ମର ନିର୍ଦେଶକ ବିବେକ ଅଗ୍ନିହୋତ୍ରୀ କହିଛନ୍ତି ଯେ ସେ ସତ୍ୟକୁ ଦେଖାଇବେ ଓ ତାଙ୍କୁ ଚୁପ କରାଯାଇ ପାରିବ ନାହିଁ ।
ଉତ୍ତର ପ୍ରଦେଶର ଇନ୍ତଜାର ହୁସେନ ସଇଦ ନାମକ ଜଣେ ବ୍ୟକ୍ତି ବମ୍ବେ ହାଇକୋର୍ଟରେ ଏହି ଫିଲ୍ମର ରିଲିଜ ଉପରେ ରୋକ ଲଗାଇବାକୁ ଆବେଦନ କରିଛନ୍ତି । ସେ ଏହି ଆବେଦନରେ କହିଛନ୍ତି ଯେ ଏହି ଫିଲ୍ମର #TheKashmirFilesTrailer ଟ୍ରେଲର ଜରିଆରେ ମୁସଲମାନ ମାନଙ୍କ ଭାବନାକୁ ଆଘାତ ପହଂଚିଛି । ଏହାର ଉତ୍ତେଜନାକାରୀ ଦୃଶ୍ୟ ସାଂପ୍ରଦାୟିକ ହିଂସାର କାରଣ ହୋଇ ପାରେ ।
ଗତ କିଛି ଦିନ ତଳେ ଏହି ଫିଲ୍ମର ଟ୍ରେଲର ଜାରୀ କରାଯାଇଥିଲା । ଖୁବ କମ ସମୟ ମଧ୍ୟରେ ପାଖା ପାଖି ଦଶ ଲକ୍ଷ ଲୋକ ଏହାର ଟ୍ରେଲରକୁ ଦେଖିଥିଲେ ଓ ଏହାକୁ ପ୍ରଶଂସା କରିଥିଲେ।
ସଇଦ ତର୍କ ଦେଇଛନ୍ତି ଯେ –କାଶ୍ମୀର ଫାଇଲ୍ସ ଫିଲ୍ମର ରିଲିଜକୁ ରୋକା ଯିବା ଉଚିତ କାରଣ ଏହାର ଟ୍ରେଲରେ ଭେଦଭାବପୂର୍ଣ ମନ୍ତବ୍ୟ ଦିଆ ଯାଇଛି । ଏହି ସିନେମାରେ ଘଟଣାକୁ ଏକତରଫା ଭାବେ ଚିତ୍ରଣ କରାଯାଇଛି ଓ ଏହା ଦ୍ବାରା ମୁସଲମାନ ମାନଙ୍କ ଭାବନାକୁ ଆଘାତ ହୋଇଛି ।
ଏହି ସିନେମାର ଟ୍ରେଲରରେ ମୁସଲମାନ ଜାଗୋ- କାଫିର ଭାଗୋ ଶବ୍ଦ କାନ୍ଥରେ ଲେଖା ଯାଇଥିବା ଦେଖା ଯାଉଛି । ଏହା ହିନ୍ଦୁ ଓ ମୁସଲମାନ ମାନଙ୍କ ମଧ୍ୟରେ ସାଂପ୍ରଦାୟିକ ଅସନ୍ତୁଳନ ତିଆରି କରି ପାରେ ବୋଲି ଆବେଦନକର୍ତାଙ୍କ ପକ୍ଷରୁ ତର୍କ ଦିଆଯାଇଛି ।
ଆବେଦନକର୍ତା ଆହୁରି କହିଛନ୍ତି ଯେ ବିବେକ ଅଗ୍ନିହୋତ୍ରୀଙ୍କର ଏହି ଫିଲ୍ମ କେବଳ ଅପପ୍ରଚାର ପାଇଁ ଉଦ୍ଦିଷ୍ଟ । ଏଥିରେ ରଚନାତ୍ମକ ଅଭିବ୍ୟକ୍ତି ନାହିଁ।
ବିବେକ ଅଗ୍ନିହୋତ୍ରୀ ଏହା ଉପରେ ପ୍ରତିକ୍ରିୟା ପ୍ରକାଶ କରି କହିଛନ୍ତି ଯେ ତାଙ୍କୁ ଚୁପ କରାଯାଇ ପାରିବ ନାହିଁ । ସେ ସମସ୍ତ ପ୍ରକାର ତଥ୍ୟ ପ୍ରମାଣ କୋର୍ଟରେ ଦେବାକୁ ପ୍ରସ୍ତୁତ ଅଛନ୍ତି ।
ସେ ଏକ ଟ୍ୱିଟ କରି କହିଛନ୍ତି ଯେ ଏକ ଛୋଟ ଫିଲ୍ମ ଠାରୁ ଯଦି ଏତେ ଡର ତେବେ ମୋତେ କୁହନ୍ତୁ ମୋ କଣ କରିବି ।
ଆଗାମୀ 11 ମାର୍ଚରେ ସାରା ଦେଶର ସିନେମା ହଲରେ ଏହି ଫିଲ୍ମ ରିଲିଜ ହେବାକୁ ଯାଉଛି ।