କରୋନା ଭାଇରସ୍ ବା କୋଭିଡ୍- ୧୯କୁ ନେଇ ସମସ୍ତଙ୍କ ମନରେ ବହୁତ ଗୁଡିଏ ଆଶା ଆଶଙ୍କା ରହିଛି । କରୋନାକୁ ନେଇ ରାଜ୍ୟବାସୀଙ୍କ ମନରେ ଅନେକ ପ୍ରକାରର ଭ୍ରାନ୍ତ ଧାରଣା ସୃଷ୍ଟି ହୋଇଛି । ରାଜ୍ୟ କୋଭିଡ୍-୧୯ ପ୍ରମୁଖ ମୁଖପାତ୍ର ସୁବ୍ରତ ବାଗଚୀ କରୋନାକୁ ନେଇ ରାଜ୍ୟବାସୀଙ୍କ ମଧ୍ୟରେ ସୃଷ୍ଟି ହୋଇଥିବା ୧୨ଟି ଭ୍ରାନ୍ତ ଧାରଣା ଉପରେ ସୂଚନା ଦେବା ସହ ଏହା ପଛରେ ଥିବା ସତ୍ୟତା ସମ୍ପର୍କରେ ସୂଚନା ଦେଇଥିଲେ ।
୧. ନାକରେ ଲୁଣ ପାଣି ଦେଲେ କରୋନା ହେବ ନାହିଁ । ଏହା ସମ୍ପୂର୍ଣ୍ଣ ଭ୍ରାନ୍ତ ଧାରଣା । ଏପରି କଲେ କରୋନା ଭଲ ହୁଏ ନାହିଁ । କରୋନାରୁ ସୁରକ୍ଷିତ ରହିବା ପାଇଁ ମାସ୍କ ପିନ୍ଧନ୍ତୁ ଏବଂ ମୁହଁରେ ହାତ ମାରନ୍ତୁ ନାହିଁ ।
୨. ଗରମରେ କରୋନା ଜୀବାଣୁ ଆପେ ଆପେ ମରିଯିବ । ଏହା ଆଦୌ ବିଜ୍ଞାନ ସମ୍ମତ ନୁହେଁ ।
୩. କରୋନା ଥରେ ହେଲେ ସାରା ଜୀବନ ରହିବ । ଏଥିରେ କୌଣସି ସତ୍ୟତା ନାହିଁ । ବୈଜ୍ଞାନିକ ତଥ୍ୟ ଅନୁଯାୟୀ ଜଣେ ବ୍ୟକ୍ତିଙ୍କୁ କରୋନା ଥରେ ହୋଇଥିଲେ ଆଉ ଥରେ ହେବ ନାହିଁ ।
୪ .ପ୍ରଶ୍ୱାସ ନେବା ବେଳେ ଯଦି ୧୦ ସେକେଣ୍ଡ ଧରି ରଖିଲେ ତେବେ କରୋନା ହୋଇନାହିଁ । ଏଭଳି ବିଲକୁଲ ଠିକ୍ ନୁହେଁ । ଟେଷ୍ଟ ପରେ ହିଁ କରୋନା ହୋଇଛି କି ନାହିଁ ଜଣାପଡିବ । ତେବେ କରୋନା ହୋଇଥିଲେ ଜ୍ୱର , କାଶ ଓ ଶ୍ୱାସ କଷ୍ଟ ଆଦି ଲକ୍ଷଣ ଦେଖାଦେଇପାରେ ।
୫. ମଦ ପିଇଲେ କରୋନା ହେବ ନାହିଁ । ଏହା ବିଲକୁଲ୍ ଠିକ୍ ନୁହେଁ । ବରଂ ମଦ ଓ ନିଶା ଦ୍ରବ୍ୟ ବ୍ୟବହାର କଲେ ରୋଗ ପ୍ରତିରୋଧକ ଶକ୍ତି କମିଯିବ । କରୋନା ତ ଭଲ ହେବ ନାହିଁ କିନ୍ତୁ ସଂକ୍ରମଣ ସମ୍ଭାବନା ଆହୁରି ବଢିଯିବ ।
୬. ଗରମ ପାଣିରେ ଗାଧୋଇଲେ କରୋନା ହେବ ନାହିଁ । ଏହା ଭୁଲ ଧାରଣା । କରୋନାରୁ ସୁରକ୍ଷିତ ରହିବା ପାଇଁ ଦିନକୁ ୫ରୁ ୬ ଥର ସାବୁନରେ ହାତ ଧୁଅନ୍ତୁ ।
୭. ମଶା କାମୁଡିଲେ କରୋନା ସଂକ୍ରମଣ ହୋଇଥାଏ । ଏହାଦ୍ୱାରା କରୋନା ହେବ ନାହିଁ । ଏହା କାଶ ଓ ଝିଙ୍କରୁ ବାହାରୁଥିବା କଣିକା ଦ୍ୱାରା ବ୍ୟାପିଥାଏ ।
୮. ରସୁଣ ଖାଇଲେ କରୋନା ହେବ ନାହିଁ । ଠିକ୍ ହେଉଛି ରସୁଣ କରୋନା ପ୍ରତିଶେଷଧକ ନୁହେଁ ।
୯ . ଛୁଆ ଓ ଯୁବକଙ୍କୁ କରୋନା ହେବ ନାହିଁ । କରୋନା କାହାକୁ ମଧ୍ୟ ହୋଇପାରେ । ତେବେ ବୟସ୍କ ମାନଙ୍କ ନିକଟରେ ଅନ୍ୟାନ୍ୟ ସ୍ୱାସ୍ଥ୍ୟ ସମସ୍ୟା ରହିଥିବାରୁ ସେମାନଙ୍କ ଠାରେ ଆକ୍ରାନ୍ତ ହେବାର ଅଧିକ ସମ୍ଭାବନା ଥାଏ ।
୧୦. ଆଂଟିବାୟୋଟିକ୍ ଖାଇଲେ କରୋନା ହେବ ନାହିଁ । ଏହା ଠିକ୍ ନୁହେଁ । ଏହା କେବଳ ଜୀବାଣୁ ନାଶକ ମାତ୍ର କରୋନା ,ଜୀବାଣୁ ନୁହେଁ ଭୂତାଣୁ । ତେଣୁ ମନଇଚ୍ଛା ଆଂଟିବାୟୋଟିକ୍ ଖାଆନ୍ତୁ ନାହିଁ ।
୧୧. କ୍ଲୋରିନ୍ ପାଣିରେ କୁଳି କଲେ କରୋନା ହେବ ନାହିଁ । ଏହା କଲେ ଅଧିକ ସ୍ୱାସ୍ଥ୍୍ୟଜନିତ କ୍ଷତି ହେବ ।
୧୨ .ପୋଷା କୁକୁର ବା ବିଲେଇ ଠାରୁ କରୋନା ସଂକ୍ରମଣ ହୋଇପାରେ । ଏହା ଠିକ୍ ନୁହେଁ । ର୍ତମାନ ସୁଦ୍ଧା ମିଳିଥିବା ରିପୋର୍ଟ ଅନୁଯାୟୀ ପୋଷା ଜନ୍ତୁଙ୍କ ଠାରୁ କରୋନା ହେବାର ଆଶଙ୍କା ନାହିଁ ।