ଏଠି ପ୍ରେମ କରିବା ମହଙ୍ଗା ପଡିଗଲା । ବିଶ୍ୱାସ କରିବା ଭୂଲ୍ ହୋଇଗଲା । ଯେଉଁ ଆଶା ବିଶ୍ୱାସରେ ପ୍ରେମିକା ପ୍ରେମିକକୁ ମନ ଦେଇବସିଥିଲା କିଛି କ୍ଷଣରେ ସବୁ ପାଣି ଫୋଟକା ପରି ଫାଟିଗଲା । ପ୍ରେମିକ ସାହିଲ ଖାଁ ପାଲଟିଲା ରାକ୍ଷସ । ସାମାନ୍ୟ ଝଗଡାରୁ କିଛି କ୍ଷଣ ପାଇଁ ପ୍ରେମ ହେଲା ସବୁଠୁ ବଡ କଣ୍ଟା । ନୃଶଂସତାର ସବୁ ସୀମା ଟପିଗଲା ପ୍ରେମିକ । ଆଉ ପ୍ରେମିକାକୁ ରାସ୍ତାରୁ ହଟାଇବା ପାଇଁ ନିଷ୍ପତ୍ତି ନେଲା ସାହିଲ ଖାଁ । ଥରେ ନୁହଁ 20 ଥର ନିର୍ମମ ଭାବରେ ଛୁରୀରେ ଭୁଷି ହତ୍ୟା କଲା । ଏପରିକି କାଳେ ପ୍ରେମିକା ବଞ୍ଚିଯାଇଥିବ ସେଥିପାଇଁ ବାରମ୍ବାର ପଥରରେ ଛେଚି ମୁହଁ ନଷ୍ଟ କରିଦେଲା । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ରାଜଧାନୀ ଦିଲ୍ଲାରେ । ଯାହାକୁ ନେଇ ଏବେ ଚର୍ଚ୍ଚା ଜୋର ଧରିଛି ।
ଦିଲ୍ଲୀର ସାହାବାଦ ଡାଏରୀ ଅଞ୍ଚଳରେ 16 ବର୍ଷର ସାକ୍ସୀ 20 ବର୍ଷର ପ୍ରେମିକ ସାହିଲ୍ ଦୁହେଁ ଦୀର୍ଘ ଦିନ ହେଲା ସମ୍ପର୍କରେ ଥିଲେ । ମୃତ ନାବାଳିକା ଜଣଙ୍କ ସାଙ୍ଗର ପୁଅ ଜନ୍ମଦିନରେ ସାମିଲ ହେବାକୁ ଚାହୁଁଥିଲେ । ହେଲେ ପ୍ରମିକଙ୍କୁ ଏହା ନାପସନ୍ଦ ଥିଲା । ସେଥିପାଇଁ ସେ ତାଙ୍କୁ ସେଠାକୁ ଯିବାକୁ ବାରଣ କରୁଥିଲେ । ହଠାତ୍ ଗତକାଲି ଝଗଡା ହେଲା । ଆଉ ଏକ ଛୁରୀରେ ଭୁଷି ସାକ୍ସୀକୁ ସବୁଦିନ ପାଇଁ ରାସ୍ତାରୁ ହଟାଇଦେଲା । ଏପରିକି ପ୍ରେମିକା ମୁହଁକୁ କେହି ଯେପରି ନ ଚିହ୍ନି ପାରନ୍ତୁ ସେଥିପାଇଁ ପଥରରେ ଛେଚି ଛେଚି ନଷ୍ଟ କରିଦେଲା ।
ଆଇପିସି ଧାରା 302 ଆଧାରରେ ଏକ ମାମଲା ରୁଜୁ ହୋଇଥିବାବେଳେ ଯୁବକ ଜଣଙ୍କ ଫେରାର୍ ହୋଇଯାଇଥିଲା । ଶେଷରେ ଆଜି ତାକୁ ଉତ୍ତରପ୍ରଦେଶ ବୁଲନ୍ଦସହରରୁ ଗିରଫ କରି ପଚରାଉଚରା କରୁଛି ପୋଲିସ । ଅନ୍ୟପଟେ ଏହି ଘଟଣାକୁ ନିନ୍ଦା କରିଛି ବିଜେପି । ଏହାସହ ଜାତୀୟ ମହିଳା କମିଶନ ଚେୟାରମ୍ୟାନ୍ ରେଖା ଶର୍ମା ଦିଲ୍ଲୀ କମିଶନରଙ୍କୁ ଚିଠି ଲେଖି ଏହି ଘଟଣାର ନିରପେକ୍ଷ ତଦନ୍ତ କରିବାକୁ କହିଛନ୍ତି ।