ବୈରାଗ୍ୟରୁ ବାବା । ବାବା ହେବା ପାଇଁ ହେଲେ ସଂସାରର ସବୁ ଲୋଭ ମୋହ ଛାଡିବା ପାଇଁ ପଡିବ । ତାହା ପରେ ହିଁ ଯାଇ ଜଣେ ବାବା ହୋଇପାରିବ । ହେଲେ ରାଜନୈତିକ ବାବାମାନେ ଟିକିଏ ଅଲଗା । ସେମାନେ ବାବା ହେଲା ପରେ ବି ଛାଡିପାରନ୍ତିନି କ୍ଷମତାର ଲୋଭ, ମାଗଣା ବିମାନ ଟିକଟ, ସରକାରୀ ସୁବିଧା, ରାଜଧାନୀରେ ଘର, ସରକାରୀ ଅର୍ଥରେ ସଭାସମିତି ବୁଲା, ରାଜନୈତିକ ପତିଆରା ଇତ୍ୟାଦି ଇତ୍ୟାଦି । ଏବେ ଓଡିଶା ରାଜନୀତିର ଜଣାଶୁଣା ବାବା ଚିକେନ ବାବାଙ୍କର ଆତ୍ମା ସେହି ଭଳିଆ ଭାରି କଷ୍ଟରେ ।
ଚିକେନ ବାବା ଦିନେ ନକ୍ସଲମାନଙ୍କ ସହିତ ସର୍ମ୍ପକ କାରଣରୁ କେନ୍ଦ୍ର ଗୃହ ବିଭାଗର ତନାଘନା ହେବାରୁ ଗିରଫ ହୋଇଯିବା ଭୟରେ ହଠାତ ରାଜନୀତିରୁ ଅଜ୍ଞାତ ବାସରେ ପଳାଇଥିଲେ । ପରେ ଯେତେବେଳେ ଫେରିଲେ ପୁରା ବାବା ବେଶରେ । ସେବେଠାରୁ ବାବା ଆଉ ନିର୍ବାଚନରେ ହାରିନାହାନ୍ତି କି କ୍ଷମତାରୁ ଦୁରେଇ ରହିନାହାନ୍ତି । ଲୋକେ କୁହନ୍ତି ବାବାଙ୍କର ଦଣ୍ଡ ବାଡି କୁଆଡେ ଭାରି ଶକ୍ତିଶାଳି । ବିଧାୟକ ହେଲେ ପରେ କ୍ରମାଗତ ଭାବରେ ସାଂସଦ ହେଲେ । ନିଜର ଲମ୍ବା ଚେହେରା, ବେଶଭୂଷା ପାଇଁ ବାବା ବି ଦିଲ୍ଲୀରେ ଭାରି ପପୁଲାର ।
ହେଲେ ଏବେ ସେ ସବୁ ବାବାଙ୍କର ଭାରି ମନେପଡୁଛି । ରାଜଧାନୀ ଦିଲ୍ଲୀର ସେଂଟ୍ରାଲ ହଲ ଏବେ ବାବାଙ୍କର ଭାରି ମନେପଡୁଛି । ଦଣ୍ଡବାଡି ବି ଆଉ ଶକ୍ତିଶାଳୀ ହୋଇକି ନାହିଁ । ହେଲେ ମୁଖିଆ ସେସବୁ ବୁଝୁନାହାନ୍ତି କେମିତି କେଜାଣି । ଯିଏ ବର୍ଷ ବର୍ଷ ଧରି ବାବାଙ୍କୁ ନିଜ ଗାଡି ପଛରେ ବସେଇ ବୁଲୁଥିଲେ, ଭୁବନେଶ୍ୱରରେ ଛକ ଚିହ୍ନୁଥିଲେ ସେ କଣ ବାବାଙ୍କର ଅସଲ ଦୁଃଖକୁ ବୁଝୁନାହାନ୍ତି ! ଯଦି ଲୋକସଭା ଦେଲନି କମସେ କମ ରାଜ୍ୟସଭା ଟିକିଏ ପଠେଇ ଦିଅ । ବାବା ସବୁ ସଭାରେ ଦୁଃଖରେ କହୁଛନ୍ତି ମୁଖିଆ କହିଥିଲେ ରାଜ୍ୟସଭା ପଠେଇବେ ବୋଲି ।
ବାବାବି ବାରମ୍ବାର କହୁଛନ୍ତି ଲୋକସଭା ହାରିବାର କାରଣ ହେଲା ଦଳ ତାଙ୍କୁ ଟିକେଟ ନଦେବା । ହେଲେ ବାବା ଆଉ ଲୋକସଭା ଲଢିବା ସ୍ଥିତିରେ ନାହାନ୍ତି । ସେ ଜାଣିଛନ୍ତି ଏବେ ଆଉ ନାନୀଙ୍କ ସହିତ ଲଢି ନିର୍ବାଚନ ଜିତିବା କଷ୍ଟ । ଏପରି ସ୍ଥିତିରେ ରାଜ୍ୟସଭା ହେଉଛି ସବୁଠି ସୁବିଧା ।
ଏମିତିରେ ସବୁବେଳେ ଅ ରେ ଅରଟ, ଆ ରେ ଆମ୍ବ, କ ରେ କଖାରୁ, ଖ ରେ ଖଟ କହି କହି କବିତା ବୋଲୁଥିବା ବାବା କେବେ ନିଜର ଗୁଢ ଜ୍ଞାନ ଲୋକମାନଙ୍କୁ ଦେଇନାହାନ୍ତି । ଲୋକମାନେ ବି କେବେ ଶୁଣିନାହାନ୍ତି ବାବାଙ୍କର ଆଧ୍ୟାତ୍ମିକତା ଜ୍ଞାନର ଝଲକ । ଯଦି ବାବାଙ୍କର ରାଜ୍ୟସଭା ହେଉନାହିଁ ତାହେଲେ ବାବା ଖାଲି କାହିଁକି ବସୁଛନ୍ତି ଯେ । ଆରମ୍ଭ କରନ୍ତୁ ଆଧ୍ୟାତ୍ମିକ ପ୍ରବଚନ । ଡିଜିଟାଲରେ ଏବେ ସେସବୁର ଭାରି ଚାହିଦା । ଏମିତିରେ ଅନେକ ଯୁବଗୋଷ୍ଠୀ ଏବେ ବିପଥଗାମୀ । ଖାଲି ସେତିକି ନୁହେଁ ଅନେକ ରାଜନୈତିକ ନେତାମାନେ ବି କ୍ଷମତାରେ ନରହିବା କାରଣରୁ ମାନସିକ ଦୁଶ୍ଚିନ୍ତାରେ ଅଛନ୍ତି । ସେମାନେ ବି ବାବାଙ୍କର ଶ୍ରୋତା ହୁଅନ୍ତେ ।