୨୦୧୯ ସାଧାରଣ ନିର୍ବାଚନ ପରେ ପିପିଲିରେ ହୋଇଥିବା ଉପନିର୍ବାଚନ ହେଉଛି ଚତୁର୍ଥ ଉପନିର୍ବାଚନ । ଆଗରୁ ତିନୋଟି ଉପନିର୍ବାଚନ ହୋଇଥିଲା ବିଜେପୁରରେ, ବାଲେଶ୍ୱରରେ ଏବଂ ତିର୍ତୋଲରେ । ସେହିପରି ୨୦୧୯ ସାଧାରଣ ନିର୍ବାଚନ ସମୟରେ ନିର୍ବାଚନ ହୋଇପାରିନଥିବା ପାଟକୁରା ଆସନରେ ବି ନିର୍ବାଚନ ହୋଇଥିଲା । ଭିନ୍ନ ଭିନ୍ନ ସମୟରେ ନିର୍ବାଚନ ହୋଇଥିବା ସମସ୍ତ ଉପନିର୍ବାଚନ ଓ ପାଟକୁରା ନିର୍ବାଚନରେ ଶାସକ ବିଜେଡି ହିଁ ଜିତିଛି । ପ୍ରାୟ ଦେଖିବାକୁ ଗଲେ ଏହି ସମସ୍ତ ପାଂଚୋଟି ଯାକ ନିର୍ବାଚନର ଫଳାଫଳ ବା ଜନମତରେ ଟ୍ରେଣ୍ଡ ଯାହା ଆସୁଛି ତାହା ପ୍ରାୟତଃ ଏକା ପ୍ରକାରର ।
ଶାସକ ବିଜେଡି (Biju Janata Dal) ଆଗରେ, ବିଜେପି (BJP) ସେମାନଙ୍କୁ କଡା ଟକ୍କର ଦେଉଛି ଓ କଂଗ୍ରେସ ଧୁଳିସାତ ହେଉଛି । ସମସ୍ତ ୫ଟି ଯାକ ଆସନରେ ପାଖାପାଖି ଗୋଟିଏ ହାରରେ ରାଜନୈତିକ ଦଳମାନେ ଭୋଟ ପାଇବା ମଧ୍ୟ ପରିଲକ୍ଷିତ ହେଉଛି । ଏଥିରୁ ବୁଝାପଡୁଛି ଯେ ଓଡିଶାର ପାଖାପାଖି ୫୦% ଭୋଟର ଶାସକ ବିଜେଡିର ସପକ୍ଷରେ ଅଛନ୍ତି ବା ଅନ୍ୟ ବିରୋଧୀ ଦଳମାନଙ୍କୁ ଭରଷା କରିପାରୁନାହାନ୍ତି । ସେମାନେ ଯେ ବିଜେଡି ଶାସନରେ ଖୁସି ଅଛନ୍ତି ସେପରି କୁହାଯାଇପାରିବ ନାହିଁ କିନ୍ତୁ ମୁଖ୍ୟମନ୍ତ୍ରୀ ଭାବରେ ନବୀନ ପଟ୍ଟନାୟକ ହିଁ ସେମାନଙ୍କର ଏକମାତ୍ର ପସନ୍ଦ ତାହା କୁହଯାଇପାରିବ ।
ବିରୋଧୀଙ୍କ ପାଖରେ ସେଭଳି ଚେହେରା ନଥିବା ଏହାର କାରଣ ହୋଇପାରେ । ବାକି ଯେଉଁ ୫୦% ରହିଲେ ସେଥିରୁ ବିଜେପିକୁ ପାଖାପାଖି ୪୦%ର ସମର୍ଥନ ମିଳୁଛି ଓ ବାକି ୧୦% ରେ କଂଗ୍ରେସ (Odisha Congress) ଓ ଅନ୍ୟମାନେ ସୀମିତ ରହୁଛନ୍ତି । ତେଣୁ ବିଜେପି ଏବଂ ବିଜେଡି ଭିତରେ ଯେଉଁ ଫରକଟା ଅଛି ତାହା ହେଉଛି ପାଖାପାଖି ୧୦%ର । ଏହାର ମାନେ ହେଲା ଯେ ବିଜେପିକୁ ଆଉ ୫% ଭୋଟ ହାତେଇଲେ ବା ବିଜେଡି ଆଉ ୫% ହରେଇଲେ ଫଳାଫଳ ଓଲଟି ପାରେ । କିନ୍ତୁ ଏହି ୫% ସଂଖ୍ୟା କିଛି କମ ନୁହେଁ ଓ ବହୁତ ସହଜ ମଧ୍ୟ ନୁହେଁ ।
ପିପିଲିରେ ବିଜେପି (Odisha BJP) ୭୬ ହଜାର ଭୋଟ ପାଇବାର ଅର୍ଥ ହେଉଛି ତୃଣମୁଳ ସ୍ତରରେ ଲୋକେ ଚାହିଁଛନ୍ତି ବିଜେପିକୁ ବା ଏକ ବଡ ବର୍ଗର ଜନସଂଖ୍ୟା ଶାସକ ଦଳକୁ ପ୍ରତ୍ୟାଖାନ କରୁଛନ୍ତି । ଗତ ନିର୍ବାଚନ ଅପେକ୍ଷା ଭୋଟିଙ୍ଗ ବଢିଛି ୭ ହଜାର । କିନ୍ତୁ ବିଜୁ ଜନତା ଦଳର (BJD) ଭୋଟ ବଢିଛି ୮ ହଜାର ଓ ବିଜେପିର ଭୋଟ ବଢିଛି ୩ ହଜାର । ତାମାନେ ଉଭୟ ଦଳର ସମର୍ଥନ ବଢିଛି କିନ୍ତୁ ବିଜେଡିର ଅଧୀକ ବଢିଛି ଓ କଂଗ୍ରେସର ଭୋଟ ଉଭୟଙ୍କ ପଟକୁ ଯାଇଛି କିନ୍ତୁ ବିଜେଡିକୁ ଅଧିକ ଯାଇଛି । ବିଜେଡିର ନିର୍ବାଚନ ଲଢିବାର ରଣନୀତି ଅଧିକ ପରିପକ୍ୱ ଅଛି ଓ ଲୋକଙ୍କ ସହିତ ଭୋଟିଙ୍ଗ କରାଇବାରେ ଆବଶ୍ୟକ ହେଉଥିବା ସର୍ମ୍ପକ ସ୍ଥାପନାରେ ସେମାନେ ଆଗରେ ଅଛନ୍ତି । ଏଥିପାଇଁ କେବଳ ପାର୍ଥୀ ନୁହେଁ ବଂର ସାମଗ୍ରୀକ ଭାବରେ ଦୁଇଟି ଯାକ ରାଜନୈତିକ ଦଳ ଦାୟୀ ।
ଆଗରୁ ବିଜେପି ରାଜ୍ୟରେ କ୍ୟାଡର ଭିତିକ ଦଳଭାବରେ ମନାଯାଉଥିଲା ଯେଉଁଠି ବିଜେଡି କଂଗ୍ରେସ ନେତା ଆଧାରିତ ଦଳ କୁହାଯାଉଥିଲା । କିନ୍ତୁ ଏବେ ବିଜେଡି ଯେ ଏକ କ୍ୟାଡର ଭିତିକ ଦଳ ପାଲଟିଗଲାଣି ଏକଥା ମାନିବାକୁ ପଡିବ । ବିଜେଡିର ସାଙ୍ଗଠନିକ ରଣନୀତିରେ ପରିବର୍ତନ ବିଜେଡିକୁ ତୃଣମୁଳ ସ୍ତରରେ ଆହୁରି ମଜବୁତ କରିପାରେ ।
ଆଉ ଗୋଟିଏ ବିଷୟ ହେଲା ଯେ ପିପିଲିରେ ଅନେକ ସମସ୍ୟା ଯେପରିକି ଫନି, ଫାଇଲିନ କ୍ଷତିପୁରଣ ଲୋକମାନଙ୍କୁ ନମିଳିବା, ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ନମିଳିବା, ଜଳସେଚନରେ ବିଫଳତା, ଆଇନ ଶୃଙ୍ଖଳା ଆଦି ସମସ୍ୟା ନିର୍ବାଚନରେ ବିଜେପିର ପ୍ରସଙ୍ଗ ଥିଲା । ଏଗୁଡିକ ବି ଲୋକମାନଙ୍କୁ ପ୍ରଭାବିତ କରୁଥିଲା ।
କିନ୍ତୁ ତଥାପି ବି ବିଜେଡି ଜିତି ପାରିଲା । ଏହାର ଅର୍ଥ ହେଉଛି ଲୋକଙ୍କ ସମସ୍ୟା ନିର୍ବାଚନରେ ଯେତିକି ନିର୍ଣ୍ଣାୟକ ଭୂମିକା ନେଉନାହିଁ, ନିର୍ବାଚନ ସମୟରେ ପ୍ରଚାର ଓ ପରିଚାଳନା ବଡ ଭୂମିକା ନେଉଛି । ହଁ ସରକାରୀ ଦଳ ପାଖରେ ସୁଯୋଗ ରହୁଛି ଯେ ସେମାନେ ପ୍ରତିଶୃତି ଦେଇପାରୁଛନ୍ତି ଲୋକଙ୍କୁ କିନ୍ତୁ ବିରୋଧୀ ଦଳ କେବଳ ସରକାରୀ ଦଳକୁ ଗାଳି କରିବାରେ ସୀମିତ ରହିଯାଉଛନ୍ତି । ନିର୍ବାଚନ ରଦ୍ଦ ହେବା ପରେ ଯେଉଁ ସମୟ ଅବଧୀ ମିଳିଲା କିଛି ମଙ୍କସର ସରକାରୀ ଦଳ ତାହାକୁ ସରକାରୀ ବ୍ୟବସ୍ଥାରେ ଯାହା କରାଯାଇପାରେ ସେଥିରେ ବିନିଯୋଗ କରିଛନ୍ତି । ଅନେକ ଲୋକଙ୍କୁ ପକ୍କାଘରର ପ୍ରତିଶୃତି ମିଳିଲା, ବାତ୍ୟା କ୍ଷତିପୁରଣର ଭରଷା ମିଳିଲା । ଯାହା ଏକ ବଡ ଭୁମିକା ଗ୍ରହଣ କରିଲା ।
ପିପିଲି ଫଳ (Pipili Elelction Result) ବିଜେଡିକୁ ଆଗକୁ ବଢିବାର ଶକ୍ତି ଯୋଗାଇଥିବା ବେଳେ ବିଜେପିକୁ ଆତ୍ମସମୀକ୍ଷା ପାଇଁ ସୁଯୋଗ ସୃଷ୍ଟି କରୁଛି । କାହିଁକି ସେମାନେ ଲୋକଙ୍କର ସମର୍ଥନ, ଶାସକ ଦଳର ଭୁଲ ଭୋଟକାକୁ ଭୋଟରେ ପରିବର୍ତନ କରିପାରୁନାହାନ୍ତି ତାହା ଉପରେ ଚିନ୍ତା କରିବାର ଆବଶ୍ୟକତା ରହିଛି । ହଁ ବିଜେପିର କ୍ରମାଗତ ଶକ୍ତି ବୃଦ୍ଧି ଆଗାମୀ ଦିନରେ ବିଜେଡି ପାଇଁ ଆହ୍ୱାନ ଏକଥା ସ୍ପଷ୍ଟ । ଯଦିଓ ବିଜେଡି ଏବେ ମାନସିକ ସ୍ତରରେ ପ୍ରସ୍ତୁତ ହେଉଛି ଯେ ବିନା ନବୀନରେ କେମିତି ନିର୍ବାଚନ ଲଢାଯିବ, ଯାହାର ପ୍ରଥମ ଝଲକ ଥିଲା ପିପିଲି ।
ସେମାନେ ପିପିଲିରେ ବିନା ନବୀନରେ (Naveen Patnaik) ସଫଳ ହୋଇଛନ୍ତି ଏକଥା ସତ । କିନ୍ତୁ ଏବେ ବି ନବୀନ ବାବୁ ହିଁ ମୁଖ୍ୟମନ୍ତ୍ରୀ ଅଛନ୍ତି ଓ ଭୋଟ ତାଙ୍କ ନାଁରେ ଲୋକମାନେ ବିଜେଡିକୁ ଦେଉଛନ୍ତି । ଯଦି ବିଜେଡିର କିଛି ଭିତର ମହଲର ବରିଷ୍ଠ ନେତାଙ୍କର କଥାକୁ ସତ ବୋଲି ମନାଯାଏ ତାହେଲେ ୨୦୨୪ ନିର୍ବାଚନ ବେଳକୁ ହୁଏତ ବୟସାଧୀକ କାରଣ ଓ ଅନ୍ୟ କିଛି କାରଣ ପାଇଁ ନବୀନ ବାବୁ ନିର୍ବାଚନର ମଙ୍ଗ ନସମ୍ଭାଳିପାରନ୍ତି ବା ମୁଖ୍ୟମନ୍ତ୍ରୀ ପାଇଁ ଇଛୁକ ନହୋଇପାରନ୍ତି । ସେତେବେଳେ ବିଜେଡି ବିନା ନବୀନରେ ନିର୍ବାଚନ କେତେ ସଫଳରେ ପାରି ହୋଇପାରିବ ତାହା ଦେଖିବା କଥା ।
ବିଜେପିର ବଡ ବଡ ନେତାମାନଙ୍କର ପ୍ରଚାରରେ ଜନସମର୍ଥନ ଦେଖିବାକୁ ମିଳୁଛି । କିନ୍ତୁ ତାହା ଜିତିବା ପାଇଁ ଯେତିକି ଭୋଟ ଆବଶ୍ୟକ ସେହି ପର୍ଯ୍ୟନ୍ତ ପହଚିଂପାରୁନାହିଁ । ନିର୍ବାଚନ ର୍ୟାଲି କରିବା, ଗଣମାଧ୍ୟମରେ ଚର୍ଚ୍ଚାରେ ରହିବା ଅଲଗା କିନ୍ତୁ ତୃଣମୂଳ ସ୍ତରରେ ତାହାକୁ ଭୋଟରେ ପରିବର୍ତନ କରିବା ଅଲଗା ଏକଥା ସେମାନେ ପୁନ୍ନଚିନ୍ତନ କରିବା ଉଚିତ୍ । ପରବର୍ତୀ ରଣନୀତି ବିଜେପିର ତୃଣମୂଳ ସ୍ତରରେ ହେବା ଦରକାର ଓ ସେମାନଙ୍କୁ ଆଉ ଆବଶ୍ୟକ ପଡୁଥିବା ୫%ରୁ ୧୦% ଭୋଟ ପାଇଁ ହେବା ଦରକାର ।
ସବୁଠାରୁ ବୃହତ ସମସ୍ୟାରେ ପଡିଛି କଂଗ୍ରେସ । ଦଳ ଭିତରେ ଅନ୍ତଃ କନ୍ଦଳ, କଂଗ୍ରେସ ଦଳର ସାରା ଦେଶରେ ବିପର୍ଯ୍ୟୟ ଏସବୁର ପ୍ରଭାବ ପଡୁଛି କଂଗ୍ରେସର ନେତା ଓ କର୍ମୀମାନଙ୍କର ଉପରେ । ଯାହା ଫଳରେ ସେମାନେ ନିଜ ଭୋଟକୁ ରଖିପାରୁନାହାନ୍ତି । ବିଜେଡି ଓ ବିଜେପିକୁ ପସନ୍ଦ କରୁନଥିବା କିଛି ଭୋଟରମାନେ ମଧ୍ୟ କଂଗ୍ରେସକୁ ଭୋଟ ଦେଉନାହାନ୍ତି । କାରଣ ଏହାଯେ କଂଗ୍ରେସକୁ ଭୋଟ ଦେଲେବି କଂଗ୍ରେସ ଜିତିପାରିବନି ଏକଥା ସାଧାରଣରେ ବିଶ୍ୱାସ ପାଲଟି ଯାଇଛି ।
କେବଳ କିଛି ହାତଗଣତି ଆସନକୁ ଛାଡିଦେଲେ ବୋଧହୁଏ ଆଗାମୀ ନିର୍ବାଚନରେ ଅନେକ ଆସନରେ କଂଗ୍ରେସ ଦଳ ନିର୍ବାଚନ ଲଢିବା ଭଳି ସାମର୍ଥ୍ୟ ଥିବା ପାର୍ଥୀ ଦେବାରେ ସକ୍ଷମ ହେବ କି ନାହିଁ ତାହା ସନ୍ଦେହ । ତେଣୁ କଂଗ୍ରେସର ଡଙ୍ଗାରେ ଏତେ କଣା ହୋଇଯାଇଛି ଯେ ବର୍ତମାନ ଏଥିରେ ବସିଥିବା ଯାତ୍ରୀମାନେ ଏବେ ଡଙ୍ଗାକୁ ମରାମତି କରିବା ବା ପାଣି କାଢିବା ବଦଳରେ ଚାହୁଁଛନ୍ତି କିପରି ଏହି ଡଙ୍ଗାରୁ ବାହାରି ଆଉ କେଉଁ ଡଙ୍ଗାରେ ବସିପଡିବା ପାଇଁ ।