ରାହୁଲ ଗାନ୍ଧୀଙ୍କ ଆକ୍ରମଣର କଡା ଜବାବ ଦେଲେ ଯୋଗୀ ଆଦିତ୍ୟନାଥ, କହିଲେ, “ଅପରାଧୀଙ୍କ ସାମ୍ରାଜ୍ୟ ଉପରେ ଯଦି ବୁଲଡୋଜର ଚଳାଇବା ଘୃଣା ତେବେ ଏହା ଅନବରତ ଜାରୀ ରହିବ” ।
କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧୀ ଉତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଉପରେ ଟ୍ୱିଟ ଯୋଗେ କରିଥିବା ଆକ୍ରମଣର କଡା ପ୍ରତି ଉତର ଦେଉଛନ୍ତି ଯୋଗୀ । ରାହୁଲ ଗାନ୍ଧୀ ତାଙ୍କୁ ଆକ୍ରମଣ କରିବାକୁ ଯାଇ ଫୁଲ ଟସ ପ୍ରଦାନ କରିଥିବା ବେଳେ ଯୋଗୀ ସେଥିରେ ଛକା ମାରି ଦେଇଥିବା ରାଜନୈତିକ ମହଲରେ ଆଲୋଚନା ହେଉଛି ।
କଂଗ୍ରେସର ସଭାପତି ତଥା କେରଳର ୱାୟନାଡ ଲୋକସଭା ଆସନରୁ ସାଂସଦ ରାହୁଲ ଗାନ୍ଧୀ ଉତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନାମ ନ ନେଇ ତାଙ୍କୁ ଆକ୍ଷେପ କରି ଏକ ଟ୍ୱିଟ କରିଥିଲେ ।
ସେ ଟ୍ୱିଟ କରି କହିଥିଲେ ଯେ, ଜୋ ନଫରତ କରେ ବହ ଯୋଗୀ କୈସା, ଅର୍ଥାତ ଯିଏ ଘୃଣା କରେ ସେ କିପରି ଯୋଗୀ ? ହେଲେ ମୁଖ୍ୟମନ୍ତ୍ରୀ ଯୋଗୀ ଅତ୍ୟନ୍ତ ଶାଳୀନତାର ସହ ଟ୍ୱିଟ ମାଧ୍ୟମରେ ଏହାର ଜବାବ ଦେଇଥିଲେ ।
ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଅଫିସର ଆଧିକାରିକ ଟ୍ୱିଟର ଏକାଉଣ୍ଟରୁ ରାମ ଚରିତ ମାନସର ପଂକ୍ତି ଲେଖି ରାହୁଲ ଗାନ୍ଧୀଙ୍କୁ କଡା ଜବାବ ଦେଇଛନ୍ତି ।
ଯୋଗୀ ଲେଖିଛନ୍ତି, “ଜିହ୍ନ କେ ରହି ଭାବନା ଜୈସି, ପ୍ରଭୁ ମୁରତି ତିହ୍ନ ଦେଖି ତୈସୀ" । ଅର୍ଥାତ ଜଣେ ବ୍ୟକ୍ତି ଭଗବାନଙ୍କୁ ସେହି ପ୍ରକାର ଦେଖିଥାଏ ଯେପରି ତାର ଭାବନା ଓ ଭକ୍ତି ଭଗବାନଙ୍କ ପ୍ରତି ରହିଥାଏ ।
ଏହା ପରେ ଯୋଗୀ ଲେଖିଛନ୍ତି, “ଔର ହାଁ ଶ୍ରୀମାନ ରାହୁଲ ଜୀ! ଅପରାଧୀ ଓ ଉପଦ୍ରବୀ ମାନଙ୍କର ସାମ୍ରାଜ୍ୟ ଉପରେ ବୁଲଡୋଜର ଚଳାଇବା ଯଦି ଘୃଣା, ତେବେ ଏହି ଘୃଣା ଅନବରତ ଜାରୀ ରହିବ ।”
ଏଠାରେ ଉଲ୍ଲେଖ କରାଯାଇ ପାରେ ଯେ ଦେଶର ସବୁଠାରୁ ବଡ ରାଜ୍ୟ ଉତର ପ୍ରଦେଶରେ ଆଗାମୀ ବର୍ଷ ବିଧାନସଭା ନିର୍ବାଚନ ହେବାର ଅଛି । ଏହାକୁ ନେଇ ରାଜନୈତିକ ଦଳ ମାନେ କାମ କରିବା ଆରମ୍ଭ କରି ଦେଇଛନ୍ତି ।
ଏଥିରେ କଂଗ୍ରେସ ନେତା ରାହୁଲ ଗାନ୍ଧୀ ଓ ଏଆଇଏମଆଇଏମର ମୁଖ୍ୟ ଅସଦୁଦ୍ଦିନ ଓବୈସୀ ଭଳି ନେତା ମାନେ ମଧ୍ୟ ଉତର ପ୍ରଦେଶରେ ନିଜର ରାଜନୀତି ଚମକାଇବା ପାଇଁ ଲୋକ ମାନଙ୍କୁ ଉସୁକାଇବା ଓ ଅପମାନଜନକ ଟିପ୍ପଣୀ ଦେବାରେ ଲାଗିଛନ୍ତି ।
ଉତର ପ୍ରଦେଶରେ ଆଇନ ଶୃଙ୍ଖଳା ପରିସ୍ଥିତି ସବୁଠାରୁ ବଡ ପ୍ରସଙ୍ଗ ଥିଲା । ସମାଜବାଦୀ ପାର୍ଟିର ଶାସନ ହେଉ ବା ବହୁଜନ ସମାଜ ପାର୍ଟିର ଶାସନ ହେଉ ମାଫିଆ, ସମାଜ ବିରୋଧୀ ଅପରାଧୀ ଓ ଉପଦ୍ରବୀ ମାନଙ୍କର ଅଖଣ୍ଡ କ୍ଷମତା ରହୁଥିଲା । ହେଲେ ଯୋଗୀ ଆଦିତ୍ୟନାଥ ଶାସନରେ ଆସିବା ପର ଠାରୁ ଏପରି ଅପରାଧୀ ଓ ଉପଦ୍ରବୀ ବାହୁବଳୀ ମାନଙ୍କ ବିରୁଦ୍ଧରେ କଠୋର କାର୍ଯାନୁଷ୍ଠାନ ଗ୍ରହଣ କରାଯିବା ଫଳରେ ରାଜ୍ୟରେ ଲୋକ ମାନଙ୍କର ଶାସନ ବ୍ୟବସ୍ଥା ଉପରେ ବିଶ୍ୱାସ ବଢିଛି ।