ଗୋରଖପୁର । ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ  ଆଦିତ୍ୟନାଥ ଗୋରଖପୁର ସହର ସିଟରୁ ବିଧାନସଭା ଲଢିବେ ବୋଲି ସ୍ଥିର ହେବା  ପରେ ସର୍ବାଧିକ ଉତ୍ସାହିତ ଅଛନ୍ତି ହିନ୍ଦୁ ଯୁବ ବାହିନୀର କାର୍ଯ୍ୟକର୍ତା । ସେମାନେ  ଯୋଗୀ ଆଦିତ୍ୟନାଥଙ୍କୁ ରେକର୍ଡ ଭୋଟ ବ୍ୟବଧାନରେ ବିଜୟୀ କରି ଇତିହାସ ସୃଷ୍ଟି କରିବାକୁ ଚାହୁଁଛନ୍ତି । ହିନ୍ଦୁ ଯୁବ ବାହିନୀର କାର୍ଯ୍ୟକର୍ତା ମାନେ ଏହାକୁ ଏକ ଦାୟିତ୍ୱ ବୋଲି ମନେ କରି ସଂକଳ୍ପ ନେବା ସହ  ଏ ଦିଗରେ କାମ କରିବା ଆରମ୍ଭ କରି ଦେଇଛନ୍ତି ।
ହିନ୍ଦୁ ଯୁବ ବାହିନୀର ପ୍ରତିଷ୍ଠା ସ୍ୱୟଂ ଗୋରକ୍ଷପୀଠର ପୀଠାଧିଶ୍ବର ଯୋଗୀ ଆଦିତ୍ୟନାଥ 2002 ମସିହାରେ କରିଥିଲେ । ସାଂସଦ ଭାବେ ଲୋକ ମାନଙ୍କୁ ନ୍ୟାୟ ପ୍ରଦାନ କରିବା ଉଦ୍ଦେଶ୍ୟରେ ସେ ଏହି ସଂଗଠନର ପ୍ରତିଷ୍ଠା କରିଥିଲେ । ପ୍ରଥମେ ଏହି ସଂଗଠନର ସ୍ଥାପନା ଗୋରଖପୁର ମହାନଗର ପାଇଁ କରିଥିଲେ । ହେଲେ ଧୀରେ ଧୀରେ ଏହାର ଲୋକପ୍ରିୟତା ବଢିବା କାରଣରୁ ଗୋରଖପୁର ଜିଲ୍ଲା ଓ ପରେ ପୂର୍ବ ଉତ୍ତର ପ୍ରଦେଶର ବିଭିନ୍ନ ଜିଲ୍ଲା ମାନଙ୍କରେ ସଂଗଠନର ବିକାଶ ହୋଇଥିଲା ।  
ଏହି ସଂଗଠନର କାର୍ଯକର୍ତା ମାନଙ୍କର ସଂଖ୍ୟା ମଧ୍ୟ ବଢିବାରେ ଲାଗିଲା । 2017 ମସିହା ଯାଏ ଏହି ସଂଗଠନର କାର୍ଯ୍ୟକର୍ତା ମାନେ  ଆନ୍ଦୋଳନ କରିବା ଓ  ଲୋକ ମାନଙ୍କୁ ନ୍ୟାୟ ପ୍ରଦାନ କରିବା ଦିଗରେ କାମ କରୁଥିଲେ । ହେଲେ 2017 ମସିହାରେ ଯୋଗୀ ଆଦିତ୍ୟନାଥ ଉତର ପ୍ରଦେଶର ମୁଖ୍ୟମନ୍ତ୍ରୀ ହେବା ପରେ ସଂଗଠନର ଲକ୍ଷ୍ୟ ବଦଳି ଯାଇଥିଲା । ଯୋଗୀ ଆଦିତ୍ୟନାଥ ମୁଖ୍ୟମନ୍ତ୍ରୀ ହେବା ପରେ ସରକାରଙ୍କ ବିଭିନ୍ନ ଯୋଜନାର ଲାଭ କିପରି ଲୋକ ମାନେ ପାଇ ପାରିବେ ସେ ନେଇ ହିନ୍ଦୁ ଯୁବ ବାହିନୀର କାର୍ଯ୍ୟକର୍ତା ମାନେ  କାମ କରିବା ଆରମ୍ଭ କରି ଦେଇଥିଲେ । ସାଧାରଣ ଲୋକଙ୍କୁ ଯୋଜନା ସମ୍ପର୍କରେ ସୂଚନା ଦେବା ଓ ତାଙ୍କର କାମ କରାଇବା ସଂଗଠନର କାର୍ଯ୍ୟକର୍ତା ମାନଙ୍କର ଲକ୍ଷ୍ୟ ହୋଇଯାଇଥିଲା ।
ପାଂଚ ବର୍ଷ ପରେ ଏହି କାର୍ଯ୍ୟକର୍ତା ମାନଙ୍କର ଭୂମିକା ପୁଣି ବଦଳିଛି । ସେମାନେ ପୁଣି ଥରେ ଯୋଗୀ ଆଦିତ୍ୟନାଥଙ୍କ ନିର୍ବାଚନ ପାଇଁ କାମ କରିବାର ସୁଯୋଗ ପାଇଛନ୍ତି । ସେମାନେ ପୂର୍ବରୁ ଲୋକସଭା ନିର୍ବାଚନରେ ଯୋଗୀଙ୍କୁ ଜିତାଇବା ପାଇଁ କାମ କରୁଥିଲେ । ପ୍ରଥମ ଥର ପାଇଁ ସେମାନେ ବିଧାନସଭା ନିର୍ବାଚନରେ ଜିତାଇବାକୁ କାମ କରିବେ । ତେଣୁ ସେମାନେ ବିଧାନସଭା ନିର୍ବାଚନରେ ରେକର୍ଡ ଭୋଟରେ ବିଜୟୀ କରାଇବାକୁ ସଂକଳ୍ପ ନେଇଛନ୍ତି ।