ଭୁବନେଶ୍ୱର, - ରାଜ୍ୟ ସରକାର ଗୋଟିଏ ପରେ ଗୋଟିଏ ମନ୍ଦିର ଖୋଲିବା ପାଇଁ ଅନୁମତି ଦେଉଛନ୍ତି । ପୁରୀ ଶ୍ରୀମନ୍ଦିର, ତାପରେ ଲିଙ୍ଗରାଜ ଓ ଧୀରେ ଧୀରେ ଅନ୍ୟ ମନ୍ଦିର ଖୋଲିଲାଣି ବା ଖୋଲିବାକୁ ଯାଉଛି । ହେଲେ ମନ୍ଦିରକୁ ଯିବାକୁ ହେଲେ ଭକ୍ତମାନଙ୍କ ପାଇଁ ଆବଶ୍ୟକ ହେଉଛି କରୋନା ନେଗେଟିଭ ରିପୋର୍ଟ । ଏହା ଭକ୍ତ ପାଇଁ ବାଧ୍ୟତା ମୁଳକ କରାଯାଇଛି । ନହେଲେ ମନ୍ଦିର ଭିତରକୁ ପ୍ରବେଶ ପାଇଁ ଅନୁମତି ମିଳିବ ନାହିଁ । ଯାହାକୁ ନେଇ ଅନେକ ଭକ୍ତ ନିରାଶ ହେଉଛନ୍ତି କାରଣ କରୋନା ପରୀକ୍ଷା ପାଇଁ ଅତିକମରେ ୪ ଶହ ଟଙ୍କା ଖର୍ଚ୍ଚ ହେବ । କାରଣ ସରକାର ଆଉ ମାଗଣା କରୋନା ପରୀକ୍ଷା କରୁନାହାନ୍ତି । ଯାହା ଗରିବ ଭକ୍ତମାନଙ୍କ ପାଇଁ ପ୍ରତିବନ୍ଧକ ସାଜିଛି । ଦ୍ୱିତିୟ ହେଲା କରୋନା ପରୀକ୍ଷା କେନ୍ଦ୍ର ବହୁତ ନଥିବାରୁ ସେଠାରେ ଲମ୍ବା ଅପେକ୍ଷା ଓ ମନମାନି ।
ଏପରି ବାଧ୍ୟତା ମୁଳକ ପରୀକ୍ଷା କେବଳ ଓଡିଶାରେ ହିଁ ସରକାର ନିୟମ କରିଛନ୍ତି । ଦେଶର ଅନ୍ୟ ରାଜ୍ୟମାନଙ୍କରେ ଥିବା ମନ୍ଦିର ମାନଙ୍କୁ ଯିବାକୁ ହେଲେ କୌଣସି ନେଗେଟିଭ ରିପୋର୍ଟର ଆବଶ୍ୟକତା ନାହିଁ । ହେଲେ ଓଡିଶା ସରକର କେଉଁ ଗାଇଡ ଲାଇନ ଆଧାରରେ ଏହି ନିୟମ କରିଛନ୍ତି ବୁଝାପଡୁନାହିଁ ।
ଆଉ ଗୋଟିଏ ବିଶେଷ କଥା ହେଲା ଯେ ଓଡିଶାରେ ସରକାର କରିଥିବା ଏହି ନିୟମ କେବଳ ମନ୍ଦିର ପାଇଁ ଲାଗୁକରିଛନ୍ତି । ଓଡିଶାରେ ଥିବା ମସଜିଦ ବା ଚର୍ଚ୍ଚକୁ ଯିବାକୁ ହେଲେ ସେପରି କୌଣସି କରୋନା ନେଗେଟିଭ ରିପୋର୍ଟର ଆବଶ୍ୟକତା ପଡୁନାହିଁ । ଏପରି ପକ୍ଷପାତିତା ପଛରେ କାରଣ କଣ ବୁଝାପଡୁନାହିଁ । କେଉଁ ଅଜଣା କାରଣ ପାଇଁ ରାଜ୍ୟ ସରକାର ମନ୍ଦିର ଗୁଡିକ ପାଇଁ ଏପରି ଏକ ପାଖିଆ ତଥା ହିନ୍ଦୁ ଭାବନା ବିରୋଧୀ ଆଇନ କରିଛନ୍ତି ତାହା ବୁଝାପଡୁନାହିଁ । ସମ୍ବିଧାନର ଧାରା ୯, ସମ୍ବିଧାନର ଧାରା ୨୫, ଧାରା ୨୬ର ଖୋଲା ଉଲଙ୍ଘନ କରି ହିନ୍ଦୁମାନଙ୍କ ପ୍ରତି ଅନ୍ୟାୟ କରୁଛନ୍ତି ରାଜ୍ୟ ସରକାର ।
ଓଡିଶା ସରକାର ଦେଶରେ ସମସ୍ତ ରାଜ୍ୟରେ ମନ୍ଦିର ଖୋଲିବା ପରେ ହିଁ ଓଡିଶାରେ ମନ୍ଦିର ଖୋଲିବା ନେଇ ନିଷ୍ପତି ନେଇଥିଲେ । ଆନ୍ଧ୍ରରେ ତିରୁପତି ମନ୍ଦିର ଭକ୍ତ ମାନଙ୍କ ପାଇଁ ଜୁନ ମାସ ୧୧ ତାରିଖରୁ ଖୋଲି ସାରିଲାଣି । ସେବେଠାରୁ କୋଭିଡ ଗାଇଡ ଲାଇନ ମାନି ସେଠାରେ ସାଧାରଣ ଲୋକମାନେ ଦର୍ଶନ କରୁଛନ୍ତି । କୌଣସି କରୋନା ନେଗେଟିଭ ରିପୋର୍ଟ ଦରକାର ପଡୁନି କାହାକୁ । ସେହିପରି ଦିଲ୍ଲୀର ଅକ୍ଷରଧାମ ମନ୍ଦିର ଅକ୍ଟୋବର ୧୩ରୁ, କେରଳର ପଦ୍ମନାଭସ୍ୱାମୀ ମନ୍ଦିର ଅଗଷ୍ଟ ୨୬ରୁ, କୋଲକତା କାଳି ମନ୍ଦିର ଜୁନ ୧୦ରୁ, ଆସାମ କାମାକ୍ଷା ମନ୍ଦିର ସେପ୍ଟେମ୍ବର ୨୪ରୁ, କାଶି ବିଶ୍ୱନାଥ ମନ୍ଦିର ଜୁନ ୯ ତାରିଖରୁ ସାଧାରଣ ଭକ୍ତମାନଙ୍କ ପାଇଁ ଖୋଲିସାରିଲାଣି । ଏସବୁ ମନ୍ଦିର ମାର୍ଚ୍ଚ ୨୧ ତାରିଖରେ କରୋନା ପାଇଁ ସାଧାରଣ ଲୋକମାନଙ୍କ ପାଇଁ ବନ୍ଦ ହୋଇଥିଲା । ଏହି ସବୁ ମନ୍ଦିରରେ ପ୍ରବେଶ ପାଇଁ କୌଣସି କରୋନା ନେଗେଟିଭ ରିପୋର୍ଟର ଆବଶ୍ୟକତା ନାହିଁ ।
ଓଡିଶା ସରକାର ଶ୍ରୀଜଗନ୍ନାଥ ମନ୍ଦିର ଓ ଲିଙ୍ଗରାଜ ମନ୍ଦିର ଖୋଲିବା ପାଇଁ ନିଷ୍ପତି ନେଲେ ଡିସେମ୍ବର ୨୫ ପରେ । ହେଲେ ଓଡିଶା ସରକାର କାହିଁକି କେବଳ ମନ୍ଦିରରେ ପ୍ରବେଶ କରିବା ପାଇଁ କରୋନା ନେଗେଟିଭ ରିପୋର୍ଟକୁ ବାଧ୍ୟତାମୁଳକ କରିଛନ୍ତି ?