ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ବିଜେଡି ସବୁ ଜିଲ୍ଲାରେ ଜିଲ୍ଲା ପରିଷଦ ( Odisha Zilla Parishad Chairman Election ) ଗଠନ କରିବ। ସବୁଠି ସଂଖ୍ୟା ଗରିଷ୍ଠତା ହାସଲ କରିଛି। ମୋଟ୍ ୮୫୨ଟି ସିଟ୍ରୁ ୭୬୬ଟିରେ ବିଜେଡି ବିଜୟ ହାସଲ କରିଥିବା ବେଳେ ବିଜେପି ୪୨ଟି ଏବଂ କଂଗ୍ରେସ ୩୭ଟି ସିଟ୍ ହାତେଇଛି। ସ୍ବାଧୀନ ଓ ଅନ୍ୟାନ୍ୟ ଦଳର ପ୍ରାର୍ଥୀ ୭ଟି ସିଟ୍ରେ ବିଜୟୀ ହୋଇଛନ୍ତି।
Odisha Panchayat ନିର୍ବାଚନରେ ବିଜେଡି ସବୁ ଜିଲ୍ଲାରେ ଏକପାଖିଆ ପ୍ରଦର୍ଶନ କରିଛି। ବିଜେପି ନିର୍ବାଚନରେ କଂଗ୍ରେସ ତୁଳନାରେ ଭଲ ଫଳାଫଳ କରିଥିଲେ ବି କୌଣସି ଜିଲ୍ଲାରେ ବିଜେଡି ପାଖ ମାଡ଼ିନି। ଏପରିକି କଂଗ୍ରେସ ଭଳି କୌଣସି ଗୋଟିଏ ବି ଜିଲ୍ଲାରେ କଡ଼ା ମୁକାବିଲା ସ୍ଥିତି ସୃଷ୍ଟି କରିନି।
2022 Odisha Panchayat ନିର୍ବାଚନ ଫଳାଫଳ କହୁଛି ଯେ ୪ଟି ଜିଲ୍ଲାରେ ଗଠନ ହେବାକୁ ଥିବା ଜିଲ୍ଲା ପରିଷଦରେ ଜଣେ ବି ବିରୋଧୀ ବସିବେନି। ସେଗୁଡ଼ିକ ହେଲା ଭଦ୍ରକ, ଦେବଗଡ଼, ଯାଜପୁର ଓ ଝାରସୁଗୁଡ଼ା। ଏହି ଜିଲ୍ଲାରେ ବିଜେଡି ପୂରା ମୂଳପୋଛ କରିଦେଇଛି। ସେହିପରି ଏଥର ବିଜେପି ୧୦ଟି ଜିଲ୍ଲା ଓ କଂଗ୍ରେସ ୧୮ଟି ଜିଲ୍ଲାରେ ଖାତା ଖୋଲିନି।
ଚଳିତ ନିର୍ବାଚନରେ ମୋଟ୍ ୨କୋଟି ୧୦ଲକ୍ଷ ୨୮ହଜାର ୪୦୩ ଭୋଟ୍ ପଡ଼ିଥିଲା। ସେ ମଧ୍ୟରୁ ବିଜେଡି ( BJD ) ଅଧାରୁ ଅଧିକ ଭୋଟ୍ ୧କୋଟି ୧୦ଲକ୍ଷ ୮୯ହଜାର ୭୧୨ଟି (୫୨.୭୩%) ହାତେଇ ନେଇଛି। Odisha BJP ୬୩ଲକ୍ଷ ୨୩ହଜାର ୭୪୬ଟି (୩୦.୦୭%) ଏବଂ Odisha Congress ୨୮ଲକ୍ଷ ୫୪ହଜାର ୩୯୮ଟି ଭୋଟ୍(୧୩.୫୭%) ଭୋଟ୍ ପାଇଛି। ସ୍ବାଧୀନ ପ୍ରାର୍ଥୀଙ୍କୁ ୨ଲକ୍ଷ ୮୧ହଜାର ୨୧୩ଟି ଭୋଟ୍ (୧.୩୩%) ଏବଂ ଅନ୍ୟାନ୍ୟ ଦଳର ପ୍ରାର୍ଥୀଙ୍କୁ ୪,୭୯,୩୩୪ଟି (୨.୨୭%) ଭୋଟ୍ ମିଳିଛି।