ଅସହାୟ ହୋଇଯିବା କାହାକୁ କୁହାଯାଏ ତାହା ବର୍ତମାନ ସମୟରେ ଆଫଗାନିସ୍ତାନର ଲୋକ ମାନଙ୍କ ଠାରୁ ବୋଧ ହୁଏ କେହି ଅଧିକ ବୁଝି ପାରିବେ ନାହିଁ । ଯେଉଁଠାରେ ନିଜର ଭୋକ ମେଂଟାଇବା ପାଇଁ ମା ମାନେ ନିଜର ସନ୍ତାନ ମାନଙ୍କୁ ମଧ୍ୟ ବିକ୍ରୀ କରିବାକୁ ବାଧ୍ୟ ହେଉଛନ୍ତି ।
ଆଫଗାନିସ୍ତାନରେ ଯେବେ ଠାରୁ ତାଲିବାନର ଶାସନ ଆରମ୍ଭ ହେଲାଣି ସେବେଠାରୁ ସେଠାରେ ସ୍ଥିତି ଧୀରେ ଧୀରେ ଦୟନୀୟ ହେବା ଆରମ୍ଭ ହେଲାଣି ।
ସେଠାରେ ସ୍ଥିତି କେତେ ଖରାପ ଅଛି ତାହା ଏଥିରୁ ବୁଝା ଯାଇ ପାରିବ ଯେ କାବୁଲର ଏକ ମହିଳା ନିଜର ଦୁଧ ଖାଉଥିବା ଝିଅକୁ କେବଳ  5 ଶହ ଡଲାର ଅର୍ଥାତ ପାଖାପାଖି 37 ହଜାର ଟଙ୍କାରେ ବିକ୍ରୀ କରିବାକୁ ବାଧ୍ୟ ହୋଇଛି ।
ଆନ୍ତର୍ଜାତିକ ରିପୋର୍ଟ ଅନୁସାରେ ଅସହାୟ ମା ନିଜର ଅନ୍ୟ ପିଲା ମାନଙ୍କର ଓ ନିଜର ଭୋକ ମେଂଟାଇବା ପାଇଁ ନବଜାତ ବାଳିକାକୁ ବିକ୍ରୀ କରିବାକୁ ପଡିଛି ।
ନବଜାତ ବାଳିକାକୁ କିଣି ଥିବା ପରିବାର ତାକୁ ପ୍ରଥମ କିସ୍ତି ଭାବେ 250 ଡଲାର ପ୍ରଦାନ କରିଛି । ବଳକା ଅର୍ଥ ସେ ଯେତେବେଳେ ବାଳିକାକୁ ନେବ ସେତେବେଳେ ପ୍ରଦାନ କରିବ ।  
କିଣିଥିବା ପରିବାର ଲୋକଙ୍କ କହିବା ଅନୁସାରେ ନିଜର ପୁଅ ସହ ବିବାହ କରାଇବା ପାଇଁ ଏହି ଝିଅକୁ ପାଳିବାକୁ ଚାହୁଁଛନ୍ତି। ହେଲେ ଏହାର କୌଣସି ଗାରଂଟି ନାହିଁ ।
ବିକ୍ରି କରିଥିବା ମାର କହିବା କଥା ଯେ ତାକୁ ଯେଉଁ 250 ଡଲାର ମିଳିଛି ସେଥିରେ ସମସ୍ତେ କିଛି ମାସ ଚଳିଯିବେ ।

ଅସହାୟ ମା ଜଣଙ୍କ କହିଛନ୍ତି – ମୋର ଅନ୍ୟ ପିଲା ମାନେ ମଧ୍ୟ ଖାଇବାକୁ ପାଉ ନ ଥିଲେ । ଏହି କାରଣରୁ ମୁଁ କୁନି ଝିଅକୁ ବିକ୍ରୀ କରିବାକୁ ବାଧ୍ୟ ହେଲି । ମୁଁ ଖୁବ ଦୁଃଖୀ । ଏପରି ହୁଅନ୍ତା କି ମୋତେ ମୋ ଝିଅକୁ ବିକ୍ରୀ କରିବାକୁ ପଡି ନ ଥାନ୍ତା। ପିଲାର ବାପା ମଇଳା ଉଠାଇବା କାମ କରିଥାନ୍ତି, ହେଲେ ବର୍ତମାନ ତାଙ୍କୁ କୌଣସି କାମ ମିଳୁ ନାହିଁ।  ମୋ ଝିଅର ଭବିଷ୍ୟତ  କଣ ହେବ ସେ ବିଷୟରେ ମୋତେ ଜଣା ନାହିଁ । ସେ ବଡ ହେଲେ ମୋ ବିଷୟରେ କଣ ଭାବିବ ମୋତେ ଜଣା ନାହିଁ , ହେଲେ ମୋତେ ଏପରି କରିବାକୁ ବାଧ୍ୟ ହେବାକୁ ପଡିଛି ।
ଅନ୍ୟ ପକ୍ଷରେ ଆଫଗାନିସ୍ତାନରେ ସ୍ଥିତି ପ୍ରତିଦିନ ଖରାପ ହେବାରେ ଲାଗିଛି । ଦୁର୍ନୀତି ଓ ଅରାଜକତା କାରଣରୁ ଧ୍ୱସ୍ତ ହୋଇଥିବା ଏହି ଦେଶ 40 ପ୍ରତିଶତ ବିଦେଶୀ ସହାୟତା ଉପରେ ନିର୍ଭର ଶୀଳ । ହେଲେ ତାଲିବାନର ଆଫଗାନିସ୍ତାନ ଉପରେ କବଜା ପରେ ବିଦେଶୀ ସହାୟତା ମିଳୁ ନାହିଁ ।
ସେହିପରି ବିଶ୍ୱ ଖାଦ୍ୟ କାର୍ଯ୍ୟକ୍ରମ ପକ୍ଷରୁ ଚେତାବନୀ ଦିଆ ଯାଇଛି ଯେ ଆଫଗାନିସ୍ତାନରେ ଅଧାରୁ ଅଧିକ ଜନସଂଖ୍ୟା ଅର୍ଥାତ 2.28 କୋଟି ଲୋକ ଆଗାମୀ ମାସ ଗୁଡିକରେ ପୁଷ୍ଟିହୀନତାର ଶୀକାର ହେବାର ସମ୍ଭାବନା ରହିଛି । ଏପରି ସ୍ଥିତିରେ 10 ଲକ୍ଷ ପିଲାଙ୍କୁ ଯଦି ଶୀଘ୍ର ଚିକିତ୍ସା ନ ମିଳେ ତେବେ ସେମାନେ ମୃତ୍ୟୁବରଣ କରିବାର ଆଶଙ୍କା ରହିଛି ।